Ссятрал мутталий дурсса эбадатраяр ххирасса махъру
Дунияллийсса оьрму Аллагьу Тааьланал жунма буллуну бур Цала рязишиву тIалав дуллай, цIимилийн умуд бивхьуну яхъананшиврул. Аллагьнал, жува ххирану, мурадру щаллу бавугу бигьа бувну бур. Цала ИдавсийхчIин ﷺ Заннал жунма баян бувну бур цумирив хъунмасса чири хьуншиврул дувайсса бигьасса эбадатру. Мукунсса ца ххуллу бувсун бур МухIаммад Идавсил ﷺ хIадисраву.
Имам Аль-Бухарил ва Муслимлул луттирдаву бур Ибн Аьббаслуясса хIадис. Муъминтурал ниттил, ХIарислул душнил Жувайриятлул бувсун бур: «Ца кьини Идавс ﷺ кIюрххил чак буван мизитравун лавгун, баргъ гьаз хьуну махъ зана ивкIуна. Га цуппа му чIумал бивкIун бур цила чак бувсса кIанайва щябивкIун эбадат дуллай. Идавсил ﷺ цIувххуну бур: «Ина чак бувну махъ миккува щябивкIун буссияв?» Жувайриятлул бувсун бур чак бувну махъ цуппа гичча къабивзшиву. Идавсил ﷺ увкуну бур: «Шичча мизитравун уккайхту, на шамилла тикрал дурссия ца дуаь (мукьра калима дусса). Амма ина кIюрххия шиннай дурсса эбадатрал чIарав диширча (гайннул чири цинцилттай буцирча), ттулми махъру кIу хьунссия». Гай махъругу: «СубхIа́на-Лла́гьи ва бихIамдигьи́ аьдада халкьигьи́, ва риза́а нафсигьи́, ва зината аьршигьи́ ва мида́да калима́тигьи».
Вай махъру шамилва буккин ца минутI гьа хьунссар, аммарив Идавсил ﷺ тIимунийн бувну, вайннул чири хъунмассар лахъисса мутталий ганал кулпатрал Жувайриятлул дурсса эбадатирттаяр.
