Дакъа хьусса арцу

АхIмад ва Аминат куннан кув хъинну ххирасса ва бавкьусса уссу ва ссу бивкIун бур.

Ца ппурттуву ниттил ми гьан бувну бур ттучанналийн аьркинмур машан ласун. Ттучанналийн бияйхту душнин хIисав хьуну дур цищара арцу дакъа хьусса. Нину дяъванссар тIий, хъинну нигьа бувсун бивкIун бур Аминат. Уссугу ссугу цивппа бувкIсса ххуллийх махъунмай лавгун, луглан бивкIун бур цащара дакъа хьусса арцух. Арцух луглай ларгун дур тамансса чIун. Яла оьрчIру хъиннува нигьа бувсун бур, ттучанналия бучIан чIал хъанахъини нину гьалак дуклай духьунссар тIий. АхIмад ивкIун ур, шаппай лавгун ниттихь арцу дакъа хьусса бусанну тIий. Амма, ссил нигьа бувсъсса лажиндарайн я щувкун, мунал цамур пикри бувну бур.

– Аминат, насу ттучанналийн, арцу яла ларсун бучIаннуча жунна аьркинмур, дула уча. Ттучанчи Аьишат жулва чIаххущарди, дулунтIиссар танил. Акъахьурча, жулла нину жува чIал хъанай гьалак дуклан дикIайча, – куну. Аминат ттучанналия аьркинмур машан ласлай бунува, АхIмад хIурхIа чIу къахьунну шавай увххун, цалла копилкалува арцугу ларсун левчуну ур ттучанналийн. Ххуллийх най унува мунан хьуна бавкьуну бур ттучанналия нанисса цалва ссу. АхIмадлул увкуну бур.

– Ссувай, ттун ляркъунни вища дакъа хьусса арцу, жула къатлул чIарав! Ина насу шаппай чантай биян бува, на Аьишатлухьхьун арцу дулун гьаннача, – увкуну. Аминатмур рязийну левчуну шаппай лавгун бур. Мунин пикривагу хьуну бакъар, АхIмадлун арцу къаляркъушиву, мунал цалла копилкалува цIусса лу машан ласун салкьи дуллай ивкIсса арцу дуллушиву. Так дакIнихтуну куннан кув ххирасса инсантуралли укунсса тIуллу дувайсса. АхIмадлул цала дурсса тIулданийну исват бувну бур цува хъинну дакI-аьмал хъинсса ва аякьалийсса уссу ушиву.

АЛЬФИЯ ИДРИСОВА