ЗанначIан гьаз дурсса кару
Цала дянивсса икьралдайн, кIулминнайн, соцсетирдайн чул бишлай аьдат хьусса халкьуннал дянив жунна чIявуну хъама дитай ца агьамсса низам: халкьуннайн букканнин цал Аллагьнайн ﷻ лабизан, дуаь дуван.
Ва укунмасса маслихIат бакъарча, бусурманчунал гьанусса мухIлухIин хъанахъиссар, дунияллухсса ва оьрмулухсса жула буругаву даххана дуллалисса ва пашманшивурттацIа буллалисса.
Инсаннал цала ургъиллу, дардру цаманащал кIидачIлачIикун, танал личIисса къулагъас къадуван бюхъайссар, цалами иширттал пикрирдай ягу цайми багьанттал цIаний. Сайки яла гъанминналгума жула къюву, миннат ягу хиял цала дакIнивун буххан къабувну, ялттутува вичIи дирхьуну кьабитан бюхъайссар. Цанчирча, гьарцама уссар дунияллух уруглай цала дакIнивусса буруккинттал призмалувухчIин. Ччайнугу, къаччайнугу чIявуминнал цаманал миннатрал агьамшиврун кьимат бищайссар цанмасса хайр-заралданул, мажал-кашилул ва мюнпатрал чулухату.
Аллагьнан ﷻ тIурча, гьарца Цала лагънал лергъ баяйссар, дардру чIалачIиссар, заэвшиву кIулссар, жунна мяйжаннугу аьркинмур дулайссар. ЧIявучин жува дуаьлуву ца зад чIа увкуну бунува, Заннал цамур дулай. Так чIун ларгун мукьах жунма бувчIай Аллагьнал ﷻ нясив бувмур мяйжаннугу хъинмур бивкIшиву. Заннан кIулссар жунма цIана хайрмургу, ахиратраву мюнпатну лякъинмургу.
МухIаммад Идавсил ﷺ увкуну бур цала асхIабтурахь: «Бунагьмур бакъасса, гъанминнащалсса арарду буцан баву чIа къатIутIисса дуаь дуллалисса бусурманчунан Аллагьнал ﷻ дулунтIиссар шамуннивасса ца: ягу мунал миннат биттур бувантIиссар, ягу ахиратраву булун битантIиссар, ягу мунил даражалийсса бала муная байщун бувантIиссар». АсхIабтурал увкуну бур: «Туну жу хъиннува чIявусса чIа тIунну». «АллагьначIамур ﷻ хъиннура чIяруссар», - куну жаваб дуллуссар Идавсил ﷺ. (АхIмад)
Ва хIадисрава аьч хъанай дур Аллагьу Тааьланал хIикматшиврул камилшиву: Цала лагътуран ччимур къадуллуну, гайннан мяйжанну мюнпатмур дуллай ур.
Дуаьрдай лабизаврийну жунна аьркинмур тIалав даву дакъасса, Заннащалсса дахIавугу цIакь дуллалиссару, жува Аллагьнах ﷻ мюжтажну бушиву мукIру хъанахъиссару, буниялсса рахIатшиву дакIурдивун духхан дуллалиссару. Заннал цIимилийн хьул бивхьуну гьаз дурсса кару тIачIав дачIра къаличIайссар – гай дуцIайссар хIакьинугу, абадлийгу жунма хъинбала бумунил.
Мудан цIимилул къапурду тIивтIусса, рахIмулул дазу-зума дакъасса, яла хъинмур жаваб дулайсса Заннайн лабизлан лахьхьиннав жунма!
