КАРАК – «АЬРАБНАЛ НУГЪАЙ-ЧЯЙ».
КАРАК – «АЬРАБНАЛ НУГЪАЙ-ЧЯЙ».
Ва чяйлул рецепт дуркIссар Индиянава. Ларгсса ттуршукулул 70-ку шиннардий аьрабнал хIукуматирттай навт ва газ буккан буллан бивкIукун, тикку зун бувкIссар тамансса Индиянал халкь. Аьрабнан миннаяту лавхьхьуну, ххуй дирзссар карак-чяй.
Каракрал ххуйну мякь лиххан бувайссар, дяркъусса чIумалгу чурх гъели бувайссар. Аьрабнал хIукуматирттайн бувкIсса туристуран чара бакъа ва чяй дулайссар. Саоьд Аьрабнаву каракравух варанттул накI ягу сгущенка хIала дувайссар. Катарнаву тIурча, мунивун личIи-личIисса мархха-ххатинну бичайссар: дарчин, хъункIул тIутIал къупру, иссиявт. Кувайтнал тучаннаву карак дахлай дикIайссар хIувин дурсса иникьалттуйн дуккан дурну.
Карак-чяйлул рецепт
Аьркин хьунтIиссар: 1 исттикан накIлил, 2-3 исттикан щинал, гьарусса дарчиндалул 1 чяйлул къуса, кIяла жавж, гьилданул 3-4 ккукку, 1 къуса лухIи чяйлул, 2 гьанна михакрал, качар ягу ницI. КIункIурдувун щин дутIайссар, дичайссар гьил, михак, дарчин, кIяла жавж ва лухIи чяй. ЦIарай щаращи бувайссар. Яла ялун накI дуртIуну 3-5 минутIрай щаращи дувайссар. Бичайссар качар ягу дишайссар ницI. ХIадурсса карак дигьайссар, чансса дякъингу диртун, гъелину дунура хIачIайссар.
Каракрал мюнпат
Ва чяйлул лахъ бувайссар иммунитет, оьттуву сахар гьаз хьун къабитайссар, къашайшивуртту сукку дувайсса бактериярду литIун бувайссар. Ттизаманнул хъиривлаявурттал тасттикь бувну бур каракрал ракрал клеткарду хъуни шаву дацIан дувайшиву. Ванил кумаг бувайссар лякьа лахъаврия. ЧIун дургьуну низамрай ва чяй хIачIларча, дукра лялиян дувайсса базурду хъин шайсса бур. Мукунма, шяра ягу грипп дирсса чIумалгу карак-чяйлул хъунмасса мюнпат шайссар.
АМИНАТ ХIАМЗАТОВА
