Суал-жаваб

– БучIиссарив зума дургьусса чIумал паста ишла бувну ккарччив шюшин?

– БучIиссар, амма пасталул тIин бусса чIемпи дюкьарча, зума зия хьунтIиссар.

– Зума дургьуманан аьтри ишла дуван бучIиссарив?

– БучIиссар, амма къадуварча хъинссар. Мукунма, аьтрилийн ссунтI учавугу къахъинссар.

– Иттав дару бутIирча зума зия шайссарив?

– Иттав дару бутIаврил зума зия къадайссар, мунил тIин кьацIливун бучIарчагума.

– Зума дургьуманан сивак ишла дуллан бучIиссарив?

– БучIиссар, амма баргъ заваллай бивну махъ къахъинссар увкуну бур. Сивакрал касак кьюлтI барчагу зума зия шайссар.

– Къалиян учаврил зума зия дайссарив?

– Къалиян учаврил зума зия дувайссар, пуркIуращал архIал гьутрурдавун никотингу бухлай бунутIий.

– БучIиссарив зума дургьуманан чурххайх крем, мазь ягу нагь дуклан?

– Ми дуккаврил зума зия къадайссар, амма гужсса кьанкь дусса крем ягу нагь дуккаву къахъинссар.

– Къашайманан ххалаххи (укол) буварча зума зия шайссарив?

– Ххалаххи баврил зума зия къадувайссар.

– КIиссурава, туннулува оьтту булурча ягу хIижама (кьуру бизаву) дуварча зума зия шайссарив?

– Зума зия къашайссар, амма мукун дурну къахъинссар.

– КIарчI учирча зума зия шайссарив?

– Кьасттирай (цалва биялалийну) кIарчI учирча зума зия шайссар. Кьаст дакъанува кIарчI учирча, зума зия къашайссар, амма чак булланнин кьацI вилаган аьркинссар.

ЦIуллу-сагъшиврул тIалавшиннаран кIарчI учин багьарчагу зума зия шайссар, амма бунагь бакъассар.

– БучIиссарив зума дургьусса чIумал чурххал вивалу ххал бувайсса аппарат бишин (эндоскопия ва м.ц.)?

– Мукунсса аппарат бишаврил зума зия дувайссар.

– Зума дургьусса чIумал ккаши кIул къахуншиврул капельница дишин бучIиссарив?

– Капельницардал зума зия къадувайссар, амма ми дишаву хъинну къахъинссар (карагьат).

– Ккарччи дуккарча зума зия шайссарив?

– Ккарччи дуккаврил зума зия къадувайссар, амма гива бувксса оьтту ягу дуккайни ишла бувсса дару кьюлтI барча, зия хьунтIиссар.

– Кьакьарттун дарув буварча зума зия шайссарив?

– Дару кьакьарттул дяния ялавай гьарча, зума зия шайссар. Кьакьарттул дянивалугу «хI» тIисса хIарп дуккайсса кIанури.

– БучIиссарив зума дургьуманан хьхьиривух, неххавух ягу хIавзравух гьузун?

– КьацIливун, майравун, вичIавун щин духхантIишиву кIулну бухьурча, хьхьириву гьузун къабучIиссар, хIарамссар.

– Зума дургьуманан мазрал лув бутайсса дару букан бучIиссарив?

– Му даруврал тIин бусса чIемпи дюкьарча, зума зия шайссар.