Кьимат лахъсса хасият
Инсаннал оьрмулул мутталий цания-ца бала-мусиват къабивну, захIматшиву къаккюрхIуну къаличIай, мукунсса дур Заннал ва дунияллий дацIан дурсса низам. Цавай инсантал миннул гъагъан бувай, вайми тIурча хъиннува кьянкьа шай. Аллагьнайн ﷻ иман дакIниву думанал ми циняв бала-апатIру яхI бувну бухIантIиссар.
Аллагьнал ﷻ Цала лагъарт ххал бувайссар личIи-личIисса бала-апатIру ялун гьан бувну: нигь, ккаши, кьянатшиву ва м.ц. Кьянкьашиву дурминнайн ликкантIиссар Заннал цIими ва барачатшиву.
Яла хъуними неъматирттавасса цану ккалли буван бучIир ссавур душиву. МусиватрачIа ссавур дурманан чири хъунмассар. Абусаид ал-Худрил бувсун бур укунсса хIадис: «Ссавур дувайманан ﷻ яхI бувансса каши Аллагьнал дулунтIиссар. Чихь кумаг чIа къаувкуну щаллу хьун хIарачат бувайма мурахас увантIиссар цайминнахь кумаг чIа тIунсса аьркиншивруя. Ссавурданул кунма лахъсса кьимат бусса неъмат щинчIав къабуллуссар» (ал-Бухари)
Бусурманчу мудан Заннайн умуд бивхьуну икIайссар. Цукунсса бала-апатIру ялун ликкарчагу, Аллагьнал ﷻ дуллусса ссавурданийну яхI бувну, захIматшиврува уккансса ххуллурду лякъинтIиссар.
Анас-асхIаблул бувсъсса хIадисраву увкуну бур: «Хъуннасса захIматшиву дурхIуманан – хъунмасса чири. Аллагьнан ﷻ инсан ххирасса чIумал, мунал хIал ххал бувайссар. Рязину кьамул бувминнай цIими бишайссар, цIуру-кIуру буллай гьалак буклакиминнайн сси ликкантIиссар» (Тирмизи, Ибн Мажагь) Ва хIадисрава жунма бувчIлай бур оьрму захIматсса бухьурча, инава Заннал кьаивтсса ххай бикIан къабучIишиву.
Ссавур даву – му так вев-шев къаучаву, аьтIаву-авара къабаву бакъарча, ци хьурчагу так Заннал чичрулийну шайшиву кIулну, Аллагьнайн ﷻ лаизлай, кумаг чIа тIий икIавури. Мунил хъирив цащава бюхъайсса хIарачатгу буванссар.
Хъиннува чIявусса бала-апатIру ликлай чIалай бухьурча дуккин ккаккан дурсса дуаь-азкарду дуссар. ХIадисраву бувсун бур МухIаммад Идавсил ﷺ увкумур: «Аллагьнал ﷻ цанма цания-ца неъмат буллувкун, ягу цIими бивхьукун (щарссанищал, хъуслищал, оьрчIащал бавхIусса иширттаву) “МашааЛлагьу, ля кьуввата илля биЛлагь” учайманайн цукунчIавсса бала къаликкантIиссар…» (Ибн ас-Сунни)
Цамур хIадисраву Аьли ибн АбутIалиблул бувсун бур: «Идавсил ﷺ ттун лахьхьин бувуна захIматшиврувун ягу нигьачIийсса тагьарданувун агьсса чIумал учайсса махъру: “Бисмиллагьи-р-рахIмани-р-рахIим. Ля хIавля ва ля кьуввата илля би-Ллягьиль Аьлийиль Аьзим”. Вай махъру зумух ласурча, бала-апатI Аллагьнал ﷻ арх бувантIиссар увкуна». (Ибн ас-Сунни)
