Бархъаллал Маллайл шеъри

"Мажму́аьтул-аьша́р" тIисса луттирава. Бишлашиссар луттираву бусса куццуй

(Дайдихьу хьхьичIмур номерданий)

УхIудрай шагьид хьуну ХIамзат бакIрайн агьувкун

ХIабибнан му ккаккаву хъиннува захIмат хьури.

Базурду личIи бувну, май кьувкьуну лявкъукун,

ХIилму ххувсса ХIабибнал хIалбагу кIул къабуври.

Гьущу-щулгъилул укан, агьний итан кьаст дурна,

Явмул-кьиямрал кьини лахъаву хъинну ласун.

Ялагу зана ивкIун Сайид ХIамзат увччуна,

Мукунсса ххулду хьуну цаймигу кьакъабитлан.

Алжандул агьулданул Сайид куну оьвчайсса,

Шугьадаътурал паччахI ца чухълуву увччуна.

БакIрайндай кIункIу дарча, ччанду чIалан бикIайва,

БакIрайн чухъа дуртуна, ччаннайн чIахIа бивчуна.

Махлукь цахлу лявхъусса, Султан цай аьтIутIисса,

Му куццуйсса гьав хьури Идавсил буттауссин.

Му шагьид хьуну мукьах ХIабиб къуману уя,

Заннал муналва цIаний Жабраил гьан увуна.

Сафият цIа учайсса ХIамзатлул ххирасса ссу

«Ва ХIамзат» тIий леххаврий УхIудрайнмай бувкIуна.

Идавсил байщун бувна, буруган къабивтуна,

Парчри багьсса базурдай ссабур кIюла хьунссар тIий.

ХIилму ва ссабур цIакьсса Сафият пашман хьуна,

ХIабибнахь изну чIа тIий тIалав дуллан бивкIуна.

Султаннал изну хьуну ХIамзатлучIан бувкIуна,

Иътикьад дусса дакIнил ссавур хъинну дуруна.

ХIамзатлуха лавхьхьуну базурду личIи бувсса

Аьбдуллагьгу увччури ХIамзатлучIа УхIудрай.

СулахIаътурал паччахI – ТIалхIат – аьрабнаву барцI,

УрчIамур чул бувгьуну хъинну хIала увххуна.

Идавсих ччаву цIакьсса ХIанзалатлучIан увкIун,

ЛачIлай иллан ивкIуна та кафир Абу Суфьян.

Махъа Шаддадлул щуну ХIанзалат щяв увтуна,

Малла́кийтурал гъа́сил, Авсийтурал багьадур.

Идавсих эшкьи хьусса ххирасса Аллагьнал лагъ

ХIанзалатгу увччуна УхIудрал ххуй аьрщарай.

Шакьаватирал ттангъа уттарана рирщусса

Гьинд учайсса малъоьнат УхIудрал лагма дурккун.

Шугьадаътурал вичIив цинил циняв кьуркьуну,

Чарсса дурну ларххуна лухIисса хъазамирайн.

ХIамзатлул ттиликI дуркун, сситтуйну кьацI увкуна,

Дюкьан кьудрат къархьуну, ккюрхIуну пув увкуна.

КъахIва бакIун лархъуна, балай итабавкьуна.

Идавсил аьралуннахь зума цIухлан диркIуна.

КIийлючин багьсса дяъви цукунди тIий гъалгъа тIий,

Ххаллилсса махъру буслай дакIру гъагъан дуруна.

Барчаллагь кур, ка ларсри, лагънахь ххуйсса махъ бувсри,

ХIамзат ивкIусса ВахIши тархъан увну гьан уври.

Аьбдуллагь тIий уссая Идавсил щалла вирдакI,

УхIудрай дуаь дурну, цала мурадрайн иври.

Базу-базу кьувкьуну, чарсри дурну ляркъуна,

КIани-кIаний ливчуна Идавсин ххира асхIаб.

ХIиминнатлул зижара Расулуллагьнахь бувну,

ХIамзат ва Аьбдуллагьлул хавар цинихь бувсуна.

Истигъфар ва истиржаъ кIинданвагу бувуна.

Савурданий ХIимнатлул ХIабибнахь гъалгъа бувна.

Сабит ва та ХIусайна, Авсийтурал шайихтал,

Вирттал аьрайн бавчукун, кулпат ябан бивтуна.

Ми кIиягу бавчуна, литIун ният дуруна.

БивкIурду кIицI лавгуна, ярагъругу бавхIуна.

Аллагь рязийсса бивкIу къахьубибав увкуну,

КьюлтIун бувкIун бувххуна асхIабтурал кьюкьлуву.

Талатаврил ттугъливун кьюлтIун хIала бувххукун,

Манзилвагу къавхьуна, мурадру бартлавгуна.

Гъазаватрай ливтIуми уттавассар увкуну,

ХIабибнайн Аллагьная аят ливккун кIул бувна.

Цал равхIанийлухь Заннал кифаърай гъалгъа бувсса,

Мурад чIа уча куну амру Занная бувкIсса.

Шагьидшиврул даража камилну цан лявкъукун,

Ялагу гъазават бан ихIяъ цанал чIа куна.

Цува щяв агьну мукьах гьаттаву цув ишиннин,

Малаиктал ххют дуллай цаначIа чан къавхьуна.

Раби́ълул арс Саэдгу чан хьуну цан лявкъукун,

ХIал цIуххин мунал хъирив чапар тIалав увуна.

ХIабибуллагьнал амру рязийну бандача тIий,      

На гьанда тIий увккуна ансартурал багьадур.

УхIудрал лагма увккун, Саэд тIалав увуна,

СаэдлучIан ивуна, шагьидтураву уя.

Хъунисса щавурттащал рухI дуллай най лявкъуна,

ХIабибнал илчи ивну Саэд куну оьвкукун,

БайливтIу ссихIиращал жаваб дуллан ивкIуна,

ЛивтIуминдавух ура, ХIабибуллагьнал илчи,

ЧIявусса салам буси ххира Заннал ХIабибнахь,

Вил ххира жандалухлу жан дуллай уя уча.

Васиятри ттул кьюкьлухь чурхаву рухI дуссаксса,

ЛичIи машару уча ХIабибнацIун кабакьлай.

Аьмрулгу чIа увкуна шагьадатирал чири,

Щяв агьну рухI дулуннин Алжандавун ияврий.

Идавсил къаку бувна, дакI дацIангу дуруна,

АрхIал увцусса лагънахь зана икIу увкуна.

Лагънал чIа тIун ивкIуна ивчIан гъазават буван,

Аьмрул рухса буллувкун, гъулам хьхьичIун увккуна.

Сайиднал хьхьичI авцIуну, рухI дукканнин ивуна,

Му лагъгу щяв агьуна, Аьмру хIала увххуна.

Назардул арс Анаслун хъиннува захIмат хьуна,

Идавсил аьралуннай ва кьияма ккавккукун.

Оьмардумма́ ТалхIатлун яхI бутлай гъалгъа бувна,

Оьмардул угь увкуна, Идавс ивкIуссар кувкун.

Туну Джиаьллул тIийкун Идавс ивкIусса хьурча,

Цибанди дуньял куну, цинявннайма оьвкуна.

Идавс ивкIусса кIанттай къаивкIуна къаличIан,

Дурккун тургу палцIа тIий, дастталувун оьвкьуна.

Бадрулий къавхьунутIий хIасратнувасса Анас

ГъалбурцIил ятту кунма, дасттарду кьатI дуруна.

Сяъду хьхьичIун ивукун, Анаслул вев увкуна,

Алжандул ххуйсса кьанкьру УхIудрай дури куну.

Анаслуйсса щавурду хIисав дуллан бивкIукун,

АрулцIалва базулий щаву хьуну ляркъуна.

Бадрулий ясир увну Идавсил канихь ивкIнал

Идавс ивчIан кьасттирай чу ябуллан ивкIуна.

УхIудрай чайгу бурттий ялун бигьлан ивкIуна,

Щуну ччалду Идавсил къавах куна увтуна.

Дарвачрайн щусса ччалдул, оь къабувксса щавулул,

Нивсру гъавгъун ивкIуна Идавсил мюъжизатрал.

Барча бакъа Убайю ивчIаврил хавардалий

Аят ливккун Идавсил циняннахьва бувсуна.

Исламрал аьрал ливну Идавс ялгъуз увукун,

Аьлин дакIнин багьуна Идавс ивкIуссарвав тIий.

Идавс ликъахъаншиву мяйжандихха увкуну,

Аьли занан ивкIуна ливтIуминдал дянивух.

Аьлин дакIнин багьуна лавай увцухьунссар тIий,

Циняв аьралундайнма Аллагьнал ссигу ливккун.

Идавс ххал къашайхьувкун жанду цибанди куну

Зулпукьаргу палцIа тIий Аьли хIала увххуна.

Дасттарду зизин дуллай ХIайдардуйн ябувукун,

ХIаллания лавгуна чапуртурал хъуними.

Чапуртурал низамру ХIайдардул ппив дуруна,

Идавсил дакI мяш хьуну Аьлил зана ивтуна.

Цинявппа аьралуннан Идавс чIалан ивкIуна,

Аьрал бигьалавгуна, Идавсгу щяивкIуна.

Абубакар ба Оьмар, гъалбарцI Аьли ба Зубайр,

Яла циняв асхIабтал хIая хьуну бавцIуна.

Аьрал нанисса ххулдийн хаварданул хъирив най

Бани Тижартурая щарсса хьхьичIун дурккуна.

Арсгу, ласгу, буттагу – шамагу ивчIаврийну,

Зажарартту бувуна, хьуна-хьуна бавкьуна.

Халкьундамма цIимилун Аллагьнал тIайла увсса

МухIаммадлуя хавар ци бур куну цIувххуна.

МухIаммад сагъну ур тIий хавар буслай унува,

Идавс ялун ивукун, нахIуну гъалгъа бувуна.

Идавсил хьхьичI дарцIуну цинил хитIаб дуруна,

Ина ккавкукун бала бигьа хьунни увкуна.

Аьжаивсса хIикматру: ширк даимсса Усайрим,

УхIудрайн аьрайн лавгун вагу бусурман хьуна.

Заннал цIими аьрхIалсса шагьдат хIасул хьури,

Алжаннун хIадур бувсса гъазитуравух хьури.

УхIудрал хъинсса вирттал тартибирай бувччури,

Ца гьаттаву кIи-кIия ихлас уллай ивхьуна.

Кьуръан гьарзану кIулмий хьхьичI-хьхьичI буллай бувччуна,

Расулуллагьнал низам тартибрай дурурччуна.

(Гихунмайгу буссар)