ЩяйтIаннул хасият

ЩяйтIаннул хасият

Иблис чапур хьусса, абадул абадлий нааьналуву личIан бувсса хасият – дакIхъуншивури.

Аьбдуллагь ибну Масъоьдлуясса хIадисраву бувсун бур ца чIумал Идавсил ﷺ увкушиву (мяъна): «ДакI хъунсса инсан Алжаннавун къауххантIиссар». Ми махъру бавсса цаннал вев куну бур: «Инсаннан ччан бикIайхха авурсса янна-ус лахлан!». Идавсил ﷺ увкуну бур: «Аллагьнан ﷻ исвагьимур ххирассар, амма дакI хъуншивруя тIурча, му – хIакьмур кьамул къабавури ва халкь кьадарну чIалачIавури» (Муслим).

ХIакьмур кьамул къабаву цири учирча – му цавурасса диялдакъашивуртту ккалли къадуллай, хъинсса насихIатрах къулагъас дакъа, дакIниву цIу ларчIсса куна: «Инагу цура ттун за бувчIин буллан, бизарда виятугу вил насихIатирттаятугу!», – тIий икIавури.

Халкь кьадарну чIалачIаву тIурча, му цува цайминнаяр лавайну, ххаллилну ккалли авури – мунийнни дакI хъуншиву учайсса.

МухIаммад Идавсил ﷺ мудан исвагьисса тIул-тIабиаьт ккаккан дувайсса диркIссар. Сайки, Макка лавсун, цува ххув хьушиву чIалай, бакIгу гьаз дурну, ххаллилну шагьрулувун уххан бюхълай бунува, Идавс ﷺ увхссар цала бакI хьхьичIун дуртун, кьус ивкIун.

Ца кьини Малик бин Динардун ккавккун ур дакI хъун дурну заназисса инсан. Маликлул ганайн оьвкуну бур: «Да инсан, Аллагьнан ﷻ мукунсса заназин къаххирассар!». «Яр вин на цурав къакIуллив?», – пахрулий цIувххуну бур ганал. Малик бин Динардул дуллуну дур укунсса жаваб: «КIулли ттун: цал ина ивкIссара кIунтIну, ахирданийгу ина нурчIилия лирчIсса кьаркъалттул касакрайн кIура аянтIиссара. Ми кIивагу ахIвалданул дянив ина уссара вивура нажас ларсун занай». Вай махъру бавукун пахрукарнан хIая хьуну: «Утти ттун бувчIунни нава цу уссарав!» – куну бур.

Жунма ччя-ччяни хIисав шай лахьхьу цичIав дакъа ивкIманахьхьун хъус ягу лахъсса къуллугъ бириярча, цайминнах пахрулий, ухттанну уруглан икIайшиву. Ххирасса уссурвал ва ссурвал, кIулну бикIияра: дакI хъуншиву дужжагьрал агьулданул лишанни. Цанчирча, Кьуръандалуву увкуну бур (мяъна): «Гайннахь (иман къадирхьуминнахь) учинтIиссар: ‘’Дужжагьрал цIарал къапурдавух бувххун, абадлий мивува личIияра!’’ ДакI хъун дурмий бикIансса кIанттул мурдалшиву!» («Аз-Зумар» суралул 72-мур аят).

Цамур аятраву тIий бур (мяъна): «Аллагьнайн ﷻ эбадат дуллан дакI хъун хьуми кьюкьалану дужжагьравун бичинтIиссар» («Гъафир» суралул 60-мур аят).

ДакIниву ухттаншиву ва кьуртI дусса инсаннан эбадатрал нахIушиву кIул къашайссар, мунал дурсса тавбалуву пашманшиврул ххютрагу къадикIайссар. Му хасиятрал мунал дакI лухIи лаган дурну, Занная арх дувантIиссар.