Рамазан зуруясса пикрирду

  Рамазан зуруясса пикрирду

Лавгунни уттигу ца Рамазан барз. Ва зуруй жува хIарачат буварду зумарду дугьлан, бюхъавай ччяни бивзун хьхьуниву тагьажжуд-чакру буллан, кIюрххил-чак ва хъатIан-чак мизитраву бан, таравихIру лях личIан къабитан, чурххал, дакIнил, мазрал бунагьру чан буван.

Хаснува тагьажжуд ва кIюрххил-чак бан бигьа хьунни, цанчирча, укунмагу кIюрххилсса дукан (сухIур) бизан багьлай бия. Цамур куццуй учирча, Заннал жуйва бивхьусса бурж – фаризасса чак буван шания бизаннияр, зума дургьуну ккашил къахьуншиврул бизан бигьану лявкъунни.

Гьарца шинал Рамазан зуруй укунсса иш шай – жунма бувчIай ччан бикIарча Аллагьнайн ﷻ эбадат багьайсса куццуй дуллан хьунтIишиву. Шинал мутталий Аллагьная ﷻ нигьа къабувсун, баччибакъашиву дуллай бивкIмигу, ккашил шаврия нигьа бувсун хIарачат буллай бия. Жула жува ашкара буварду. Жувагу мукун бивкIхьурча, жула диндалул, имандалул хIакъираву ххуйну пикри буван аьркинни.

Зума дугьайсса барз – дакI марцI дайсса чIун,

Янил ляпI чиннинма лавгун лявкъунни.

Вана дуркIун байран – Зумаритавал,

Кьамул даннав Заннал гьарнал эбадат.

Зал рязисса аьмал чIяву буваннав,

ТалихIрайн букканнав циняв бусурман.

Барча хьуннав, дустал, бюхттулсса байран,

Барачат бишиннав жула къат-раву!