Яла ххирамур жавгьар

Ца шяраву ялапал хъанай ивкIун ур Юсуп тIисса 13 шинавусса оьрчI. Гайннал ххуйсса кулпат бивкIун бур: бутта, нину, уссу ва ссу. Нитти-буттал оьрчIру гьарца аьркинмунил дузал бувайсса бивкIун бур, амма Юсуплун тачIав пикри къашайсса бивкIун бур цивппа щаллу буваншиврул буттал ва ниттил цуксса захIмат бихьлахьиссарив.

Ца ссутнил кьини бутта даврия шавай увкIун ур. Юсуплун ганал духсса, хъя-хъя кусса, щин духлахисса усру хIисав хьуну дур:

– Буттай, вин цIусса усру ласун аьркинни! - увкуну бур арснал.

– Ласунна, ттул арс. Чансса махъ ласунна, – дуллуну жур жаваб буттал, цала уссахгу уруглай.

Гьунттимур кIюрххил ниттил Юсуплуйн оьвкуну бур цинма ичIув чансса кумаг буван.

– Дадай, ттул чIун дакъар, цал компьютерданийсса тIуркIу къуртал буванна! - увкуну бур арснал.

Чансса хIаллава ниттил ялагу оьвкуну бур арснайн:

– Юсуп, нану кIюрххилсса дукан!

ОьрчIан си бивзун бур:

– Къачча! Ити на паракьатну, бахчаву цира?!

Ниттил ссихI къадурккун дур.

Дяхтта оьрчI кьатIув тIуркIу тIий ивкIун ур. Арс шавай уххайхту, ниттил миннат бувну бур:

– Ттул арс, насу ттун чансса хIачIансса щин ласи.

– Къахьунссар дадай, увххунна! – куну цала къатлувун лавгун ур арс.

Ца-кIива гьантлува Юсуплул буттахь миннат бувну бур цанна интернетраву ккарксса янна ласи куну. Буттал дуллуну дур аьркинссаксса арцу.

Ца кьини Юсуп цIан-чаннаву шания ивзун ур, мякь хьуну. Кухнилуву нину диркIун дур янна шюшлай, лази-лакьи дуллай.

– Дадай, ина циван шанай бакъара?

Ниттил пиш увкуну бур:

– Гьунттинин вингу, буттангу лаххансса марцIсса янна хIадур дуллай бура.

ОьрчIал оьрмулуву цалчин пикри хьуну бур ниттил цува дузал уван бихьлахьисса захIматрая.

Тинай бутта ивкIун ур цала тIартIсса усру марцI дуллай, дакьин дуллай. Ганайн я щайхту Юсуп хъювусул увккун ур. ДакIнин багьну бур цала ссихI дукканнинна буттал цанна ххуй дирзсса цIусса янна ларсшиву.

Ниттийн хъямалагу агьну увкуну бур:

– Дадай, на багъишла ити! Ттун къакIулссия зу буллалисса захIмат. Ттиния тинмай на мудан зун кумаг булланна.

– Буттай, инава усру дакъа унува ттун цIусса янна циван ласав, ттул укуннагу диялсса янна дурхха?!

– Ттул арс, жун хъус-хъиншиву чIярусса къааьркинни. Жул хъус – зуру, жул оьрчIру.

Юсуплул иттату макь най диркIун дур. Ганан дакIнин багьну бур ца нюжмар кьини мизитраву имамнал увкусса махъру:

– Инсаннал яла хъунмур неъмат арцу-муси, къатри, машинартту бакъар. Буссар кьимат хъинну лахъсса ца неъмат, амма инсаннал ганин кьимат бувайссар так га яла лавгукун. Му неъматгу нину ва буттари.

Ганияр махъ Юсуплул цIакьсса нанижат дурну дур ниттин ва буттан къаччан бикIансса тIул тачIав къадуван.