Пикрирдал бакIщаращи
ДакI ва пикрирду аьркин бакъамуния дуруччиншиврул, буруччин аьркинссар чурххал базурду: яру, вичIив, маз, кару, ччанну.
ДакIнивун щугълурду буххайссар мукьва ххуллувух. Цалчинмур – нафсирал гьавасру. Масала, кIирисса кьини зума дургьусса инсаннан дяркъусса щин ккаккарча, му чIумал нафсиран ци ччан бикIанссар? Мунан ччиссар щин хIачIан, дюхлул хьун. Му гъира ча бувкIссар? Нафсирал гьавасрава. Цамур мисал: жуйхра щил-дунугу хъат рищурча, жула цалчинмур пикри бикIай махъуннай рищунсса. Мугу нафсирал гьавасри.
КIилчинмур ххуллу – щяйтIан. ХIадисраву бувсун бур щяйтIан инсаннал дакIнивун буххайшиву. Инсаннал Аллагьнал ﷻ цIа кIицI лагарча, щяйтIан лихъайссар, Аллагь ﷻ хъама итарча махъунмай зана бикIайссар.
Шамулчинмур – малаик. Имам СуютIил луттираву чивчуну бур: «Малаикнал инсаннал дакIнивун бутайссар хъинмур бувансса пикри, хъинбала баву ххира бувайссар, амма щяйтIан бувкIун, оьмур чIюлу бувну, аьйкьин уллан бикIайссар». ЩяйтIаннуйн мютIи хьуманал бунагь бувайссар, малаикнах вичIи дирхьуманал – хъинбала бувайссар. Ххуйсса пикри буххарча – му малаикнаятур ﷻ, оьмур бувансса гъира – щяйтIаннуяр, му чIумал «ао́ьзу би-Лля́гьи мина-щайтIа́ни-рражи́м» учин аьркинссар.
Мукьилчинмур – инсаннал дакIнивун тIайланма Аллагьная ﷻ нанисса пикри – илгьамри.
Ца минутIрал мутталийгума бакIравун буххай хъинну чIявусса пикрирду. Цаппара аьлимтурал тIимунийн бувну, инсаннал бакIравун гьантлул мутталий 70 000 пикри буххайсса бур. Мигу ягу ххуйсса ягу оьккисса бикIантIиссар. ДакI дуруччиншиврул пикрирдал ялув бацIан аьркинссар: хъинмур барт лаган буллай, оьккимуния арх хъанай. Оьккисса пикрирду арх къабулларча, миннул щала дакI дуцIин дувайссар, инсан бунагькарнайн кIура аяйссар. Мунияту, Заннал жуйва ялув бивхьусса фаризартту биттур баврищал, Аллагь ﷻ дакIнийну бикIан, зикрилий даин хъанан, нафс мютIи буллан аьркинссар. Мукунсса тагьар дакIниву дугьан лахьхьин бувайсса элмугу – тасаввуф, тIарикьатри – Сайфуллагь-кьадинал, Гъазигъумучиял щейх Жамалуттиннул ва цаймигу аьлимтурал ва имамтурал язи бувгьусса ххуллу.
