АДАБИЯТ

Ччаву

Ларгссарив вай ттул шинну,
Дакьассарив тти ччаву?
Ларгунугу мий шинну
КъамютIиссара миннуйн,
ДунутIий ва дакIниву
Ччаву яла мяйжанмур.
Заннаха хьусса ччаву
Дакьарив яла марцIмур?!
Ххира заннах ччаву дан
Аьркинссаривкьай шинну!

Заннал лагъ

Циняв зунттурдал паччахI
Кьаплул зунтту бунугу,
Кьаччива ттун паччахIшив
Заннал лагъшив дакьасса.
Щала дуньял дурцIусса
Арцу-мусинияргу
Ччива заннал дуллусса
Элму цув ца кIунтIуксса.
Ххира Заннал бюхттулшив,
Заннал элмурдал ххуйшив!
Вихара эбадат дан
Нясив бува, я жул Зал!

Дуаь

Дуаь – му хIурнири тIар
Заннал жунна дуллусса,
ЛавхIул махIфузравусса
Чичру даххана дайсса.
Лахьхьин дува я жул зал
Дуаь кьамул дувансса!
Я алжаннулгу Заллуй,
Ялув-Кяьбалул Заллуй,
РахIму-цIимилул Заллуй,
Жуй рахIму-цIими бува!

Тавба

Малаиктурал Заллуй,
Идавстуралгу Заллуй,
Циняв лагътурал Заллуй
Жуй рахIму-цIими бува,
Жу дурсса эбадатру
Царагу кьамул дува!
Идавстурал тавбарду
Циняр кьамул дурссар тIар.
Лахьхьин дува, я жул зал
Кьамулсса тавба дуван!

Заннан ххирами

Тагьажудрал чак байма
Заннан ххирасса лагъри,
Цал чакру кьамул байма
Хъиннува ххирассари.
Тавбалул ялу авцIма
Заннан ххирасса лагъри,
Цал тавба кьамул дурма
Хъиннува ххирассари.
Дуаьлул ялув авцIма
Заннан ххирасса лагъри,
Цал дуаь кьамул дурма
Хъиннува ххирассари.
Эбадат щаллу дайма
Заннан ххирасса лагъри,
Эбадат кьамул хьума
Хъиннува ххирассари.
Вирдирдал ялув авцIма
Заннан ххирасса лагъри,
ЦачIан усттаз учIайма
Хъиннува ххирассари.
Идавс макIра ккавккума
Заннан ххирасса лагъри,
ЦачIан идавс учIайма
Хъиннува ххирассари.
Я жул ххирасса Заллуй,
Жуй рахIму-цIими бува.
Вила ххираминнавух
Жугу хIалану бити!

ЧIУРТТАЩИЯЛ ЯХIИЯ