Хъанниясса хIадисру

Хъанниясса хIадисру

Исламраву хъамитайпалул кьимат хъинну лахъссар, цаппара СМИ-лул жунма му иш цамур куццуй чIалачIи буллай бунугу. Душ, нину, щарсса, ссу – вай цIардавасса цания-ца ларсъсса хъамитайпалун тамансса хъиншивуртту ва даражарду буссар: душ сававну бутта Алжаннавун уххайссар, щарссанил цила ласнал иман щаллу дувайссар, нину – цила оьрчIру Алжаннавун буххансса сававну шайссар.

МухIаммад Идавсил ﷺ хIадисирттаву цимилгу кIицI лавгун бур хъамитайпалул кьимат-даража. Буцинну мукунсса мяъна дусса цаппара хIадисру. Идавсил ﷺ увкуссар: «Дунияллийн душ бувсса чIумал Аллагьнал ﷻ гиккун малаиктал гьан бувайссар. Гайннал учайссар: ‘‘Ссалам ва къатлул агьулданун’’. Яла цала хъару душнил ялтту тIитIин дурну, бакIрайх кахгу тIий учайссар: ‘‘Ва заэвсса, гъаривсса душ бувкссар заэвсса чурххава. Буттал ва тIайлану хъунма булларча, мунан Аллагьная ﷻ кумаг буссар Кьиямасса кьини дучIаннин’’» (ТIабарани)

ХIадисраву увкуну бур: «Цала душру тарбия буллай, аякьа дуллай ивкIсса адимина ххассал хьунтIиссар дужжагьрал цIараща» (ал-Бухари, Муслим) Цамур хIадисраву тIий бур: «Зувату яла ххуйма – зула душваращал ва хъаннищал хъинмари» (алБайгьакьи) Идавсил ﷺ увкуну бур: «Ва дуниял зун чIумуйссар дуллусса. Дунияллий адиминахьхьтун дириян бюхъаймунива яла ххуймур – салихIсса щарсса» (Муслим) Ялагу увкуну бур: «Кьинилун ххюва чак бувайсса, Рамазан барз бугьайсса, чил арамтурая бурувччусса, ласнайн мютIийсса хъамитайпалун ихтияр дулунтIиссар Алжаннавун цинма ччимур къапурдавух буххан» (ал-Баззар). ХIадисраву увкуну бур: «Ва дунияллийсса бусурман хъами Алжаннул хIурулэнтураяр арулцIалазарва даражалул ххаллилссар» (Ибн ал-Мубарак)

Ца кьини МухIаммад Идавсин ﷺ ккавккун бур варанттай буртти нанисса хъами. Варантту бачин бувну нанима гайннуйх мархь бишлай, ххяххан бувну най ивкIун ур. Идавсил ﷺ ганахь увкуну бур: «Варантту хIурхIа, личIлулну бачин бува, ина бурулданул къуршиврача лавсун нанисса» (ал-Бухари) Идавсил ﷺ ялагу увкуну бур: «Лякьлуву оьрчI бусса ва оьрчIан ккукку буллалисса щарсса Аллагьнал ﷻ ххуллийсса къаралчири. Му чIумал бивкIусса хъамитайпалунгу шагьиднал чири буссар» (ТIабарани) Муаьвия Сулами тIисса асхIаб ИдавсичIан ﷺ увкIун увкуну бур: «Я Аллагьнал Идавс e. Ттун ччай бур гъазаватрайн уккан.

На вияту ихтияр ласун увкIра», – куну. Идавсил ﷺ цIувххуну бур: «Вил нину сагъну дурив?» «Дур», – куну бур Муаьвиял . «Туну ина ганий аякьа дува, хIакьну, Алжан ниттил ччанналури бусса!», – увкуну бур Идавсил e.

ШАМИЛ МАХIАММАДОВ