ТIайлабацIу хъанай бакъар
Ттун 31-ра шин хьунни, амма на ттигу щар къавхьура. Циваннив къакIулли, тIайлабацIу хъанай бакъар. Миннатри, балики Кьуръандалуву, диндалул луттирдаву ттул буруккинттарансса дарман бухьурча кказитрай чичияра.
Мукунсса ишираву хъинмунийн хьул кьукьин буван, пашман хъанан къааьркинссар. Хъанахъимур гьарзад Аллагьнал ﷻ чичрулийнур шайсса. Жунмасса хайр ссаву буссарив Заннан бакъа къакIулссар. Мунияту, виярва аскисса тагьардануву ливчIминнах бурувгун, щукру бувну, Аллагьнал ﷻ цIимилийн хьул бивхьуну, дуаь дуллан, хъинмур чIа тIун аьркинссар.
Аьлимтурал тIимунин бувну, мукунсса чIумал Кьуръандалул сура «ТIа-гьа» чIявуну бувккуну хъинссар. Мунияту хIарачат бувара ва сура ккалан, нитти-буттахьгу буккияра уча.
Дуссар укунсса дуаьрдугу:
رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا
«Раббана гьаб ляна мин азважина ва зуррийятина кьуррата аъюнин, ва-жъаьльна лил-муттакьина имама».
Мяъна: «Жул Заллуй, кулпатирттаву ва оьрчIаву жул яруннин ххаришиву дула, бува жу Виятува нигьа бусаврил эбрат ласунмину».
رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ
«Рабби инни лима анзальта иляйя мин хайрин факьир»
Мяъна: «Я Аллагь, Ина ттунма тIайла буккансса циняв неъматирттах на мюжтажну ура (бура)».
