Карамат ккаркманал барашин
Карамат ккаркманал барашин
Жула Идавсин ﷺ идавсшиву дуллуссар итни кьини. Мунайн вих хьуну, иман дирхьуну, Исламрал ххуллу цалчин бувгьусса инсан ивкIссар Абубакр Сиддикь. Мунал хъирив тталат кьини бусурман хьуссар ацIния кIира шинал оьрмулувусса Аьли ибн АбутIалиб – цала оьрмулуву тачIав къанчурдийн икрам къабувсса чIаважагьил. Аьлил цала бувсун бур: «На ниттил лякьлувусса чIумал ганин пикри хьуну бивкIун бур къанчирайн икрам буван гьан. Аллагьнал ﷻ чичрулийну му ссятраву ганил къюкIливу аьжаивсса цIуцIаву хьуну, цила пикри хъама бивтун, чунчIав къалавгссар». Аьли хъуна хьуссар МухIаммад Идавсил ﷺ хьхьичI. Аьббаслул бувсун бур Кьуръандалуву Аьлин хас бувсса шанттуршва аят бушиву.
Бусала
Шамилчинма халиф Оьсман ибн Аьффан Кьуръан цачIун буллай, чичлачисса чIумал ца нюжмар кьини чаклил хъирив каругу гьаз дурну дуаь дуллай ивкIун ур. Микку муначIан ца аьраб увкIун, увкуну бур: «Да, Кьуръан чичлачима! «Таббат» тIисса сура «Ихлас» тIимунияр хьхьичI бикIан къабучIиссар. Пикри барча, му иш мукун бикIан къабучIир». Га инсаннан ччай бивкIун бур сурарду чичаврил низамрал мяъна кIул дуван.
Оьсман-асхIабнал ганал яруннайх кагу дурккун увкуну бур: «Ургу кIиккун, чIалай бурив ЛавхIул-МахIфуз? Аьраб мюрш ивкIун урувгун ур халифнал ккаккан бувсса кIанайн. Ккавккун бур ЛавхIул-МахIфуз. Ганий бивкIун бур халифнал тIисса низамрай чивчусса Кьуръандалул сурарду. Мукунсса караматрал бара шаврил махIаттал увсса адимина халифначIа къуллугъ буллай авцIуну, ливчIсса оьрмугу Аллагьнайн ﷻ эбадат дуллай гьан бувну бур.
Аьдий бин Хатимлул бувсун бур: «Халиф Оьсман ивкIусса кьини ттун ца аьжаивсса чIу бавуна: «Я Оьсман ибн Аьффан! Вин баян буллалиссар ххарисса хавар: ина бигьану ва рахIатну, цукунчIавсса аьзав къадурну вила Заннащал хьуна акьинтIиссара. Ина Заннал багъишла ивтссара, Алжаннул къапурдачIа ина Ризван-малаикнал хьуна акьинтIиссара»
