Чаклил агьамшиву
Чаклил агьамшиву
Исламрал рукнурдал яла ххирамур рукну чакри, диндалул ттарцI мури. Чурххал дувайсса эбадатрал яла ххирамур мури. Аллагь рязи шаймур мури. Идавстурал ссуннатри. Малаиктуран ччимурди. ЩяйтIаннул лажин лухIи даймурди. Бунагьирттал аьфву баймурди. Аллагь ﷻ кIулшиврул нурди. Муъминчунал ярагъри.
Мунийну хъусливу барачат буссар, касмулуву мюнпат хъунмассар. Гьаттаву чирахъри. Миву лув бутайсса шанур. Миву тирх учин аймурди. Мункар-Накирнахьхьун жаваб дулаймурди. Кьиямасса кьини ялув дацIантIисса ххютри. БакIрайсса тажри. Чурххайсса яннари, Дуржагьрал дянивсса пардаври. АллагьначIа хIуччари. Мунал хьхьичIсса нурди. Мизандалуву хьумурди, ссиратрайх лахъан аймурди. Алжаннул кIулари. Дуржагьрал кьункьулари. Мунивусса фазиларду, хIикматру чIяруссар. ХIасил чакливу ацIния кIиазарда хасшиву дуссар. Муниву тасбихI, тахIмид, такьдис, таъзийм дуссар. Дуаь даву дуссар, Кьуръан буккаву дуссар, цайми-цайми чIярусса эбадатру дуссар. Му чак – оьшиву яла гьан дайсса хъиншивур. Кьинилий бувайсса ххювагу чаклил масъала, цалва къатлул хьулувух нанисса марцIсса неххал масъалар, кьинилун ххюйлва чурх шюшлашисса, марцI буллалисса. Мукунма гьарца чак бувтарий хъуни бунагьру бакъамий, гьарца бунагьрая марцI хъанахъиссар, рукнушартIгу, рукуъ-сужудгу камил дарча. ХIатта Кьиямасса кьини инсаннал бувсса аьмаллаяту хьхьичIва-хьхьичI суал бувну уругантIисса аьмал – чакри. Му тамамну кьамулну бувну лякъирчан, махъмийгу циняв кьамул бувантIиссар. Къалявкъурив, цинявгу зия хьунтIиссар. Гьарзадрал ттарцI мури.
Чак къабайсса инсаннал сипатраву нур дакъассар, дакIниву иман чанссар, ризкьилуву барачат бакъассар, касмулия неъмат бакъассар, Заннал ﷻ душманни, иблислул дусри, муъминтурал язидри. Залимтурал кабакьур, Тавратраву малоьнни, инжилдалуву малоьнни, Забурдануву малоьнни, Кьуръандалуву малоьнни. Лухччи-ссавнил нааьна дувайссар. Бургъи – зурул нааьна дувайссар, ущу-щулгъилул нааьна дувайссар. Гьарца хIайвандалул нааьна дувайссар. Цинявннан душман шайссар. БивкIулул сакарат захIмат байссар. Гьаттал аьзаб цIакь дувайссар. Кьиямасса Кьини лажин лухIину изайссар. Дунияллийгу алши бакъур, ахиратлул неъмат бакъур. Дунияллух Ахират дарххумари. Машуву зарал хьумари, дунияллул цIимилияту махIрум хьумари. Ахиратлул неъматраяту айщун увмари. Мунан зад дулун, муначIа щя икIан, мунащал ачин гьалмахчу хьун къахIалалссар. Мунал цамур цичIав бувсса аьмал кьамул бакъассар.
«ГьунчIукьатIан»
