Дунияллул неъматиттая арх буцаву
Дунияллул неъматиттая арх буцаву
Загьидшиврул (дунияллул неъматирттая арх шаврил) мяъна
Дунияллул неъматирттая арх буцаврил (зугьд) мяъна – вила дакIнива Аллагь ﷻ личIаннин гьарца зад дуккан давури, дунияллул хъус лякъаврил кьяйдардая ва цурда хъуслия махъунай шавури. Загьидшиврул мяъна – лахъисса оьрмулийн хьул къабишаву, дакI ва кару дунияллул неъматирттая марцI давури. Ччаврил инсан цала жан дулун хIадур увайсса куна, загьидшиврулгу инсан цала хъуслил хIакъираву чумартшивручIан уцайссар.
Шанна хасият дакIниву цIакь къархьусса инсан къаиянтIиссар хIакьсса загьидшиврул даражалийн.
Цалчинмур – дуллалисса тIуллацIун дакI дахIин къадаву, дакI так Аллагь Тааьланащал дахIаву, Заннайн таваккал бутаву. Цанчирча, инсаннаща цичIав дуван къашайссар, так Заннал нясив бувмур бакъа.
КIилчинмур – тамахI-карсса ихтилатру къабаву, цайминнал канихьсса неъматру тIалав буллалисса махъ къаучаву.
Шамилчинмур – инава цуксса хъунну, лавайну унугу, халкьуннаву сий дуну икIан кIункIу къатIаву, дакI хъун къадаву. Мунил мяънагу – Аллагьнал ﷻ инсан цукун лахъсса даражалийн гьаз уварчагу, хIакьсса Заннал лагънан цува цайминнаяр лагьну чIалан икIайссар. Мукунсса инсан цайминнал хъунаману, бакIчину хьун хIарачат буллан, гайннаяр узданну цува чIалан къаикIайссар.
КIулну икIу, дунияллух неъматирттах ччаву душиву – Аллагьнал гьан дурсса циняр шяриаьтирттаву оьчулий ккаккан дурссар, цанчирча, му дунутIий гьарца бунагьрал гьану ва гьарца питналул багьана. Мунияту Аллагьнал лагънан чара бакъа аьркинссар дунияллул неъматирттая дакI дуцан дуван, мунива халкьуннаву сий дуну икIансса умуд буккан буван. ХIакьну, сий дуну икIан ччишиву оьккиссар хъус ххирашивунияр. Ми хасиятирттал инсаннан оьрмулул лазатру ххира хьун бувайссар. Лазатругу – инсаннал гьанусса душманталли.
