Къия дирсса чIумал ссавур даву
Къия дирсса чIумал ссавур даву
(дайдихьу хьхьичIми номердай)
ХьхьичI чивчумунива дарс ласун гьарцаманаща къашайнутIий, халкь буссар муданнасса захIматшивурттаву ва захIмат-жапалуву, куннал куннан буллалисса зарал бухIлай. Мукунсса инсантуран хъуннасса нигьачIин дуссар – дунияллий ва ахиратраву гьалакшиву дияйссар, так Аллагьнал ﷻ аякьалул бурувччуми личIаннин.
Аьвамсса инсантурайн зарал бивсса чIумал, миннал аьй дувайссар так цанма къаччан бикIан бувманай. Мунил багьанагу – ми халкь гъапулну, Аллагьнал ﷻ цIа кIицI лагаврия ва хIикматшивруя архну бунутIий. Мукунсса халкьуннал хIарачат бантIиссар цайнма бивсса заралуннийн данди буккан, цалва гуж, чIявукIулшиву ва цалва нафсирал кьуват ишла буллай. Мунияту миннан багьайссар халкьунаясса заралуннийн ссавур дуван, миннан танмихIнугу цалва рувхIанийсса мурчIишиврул дуснакьраву щябикIаву хьунтIиссар.
За хIисав шайсса, лаласайсса, аькьлукарсса инсаннан бувчIинтIиссар халкьунная биллалисса зарал Аллагь Тааьланал чичрулийну бушиву ва мунийн къарши уккан щищачIав къашайшиву. Мунияту мютIисса лагънал кIулшилул ва аькьлулул тIалав буллалиссар ацIаву дакъа так Аллагьнайн ﷻ лаизлай, цала заэвшиву ва кьуват бакъашиву бакIрайн ларсун. Му куццуй, мукунсса Адамлул оьрчIал кьянкьану чул бищунтIиссар гьарца заралмуния буруччайсса Аллагьнал ﷻ Кьудратрайн. Му чIумал щак бакъа Аллагьнал ﷻ байщун бувантIиссар халкьуннаясса зарал, захIматшивуртту яла гьан дантIиссар. Цанчирча, халкьуннал буллалисса оьбалалул цIу лахъарчагу, мунилгу зарал къабувантIиссия Аллагьнал ﷻ кумаграйн чул бивщуманан. Заннайн таваккул бувтманай щилчIав ва ссалчIав бияла бакъассар.
ЦIанасса заманнайн гьарца инсаннан ссавур даву чара бакъассар. Ялув чивчусса куццуй мудан тIайламур ххуллу бувгьуну нанима дунияллул ва ахиратрал талихIрайн уккантIиссар. Му ххуллия авккума Аллагьнал ﷻ чичрулийну цала нафсирахун агьну личIантIиссар. Яла му инсан ачинтIиссар халкьуннаясса заралданин данди уклай, цалва гуж ва хIиллакаршиву ишла дурну, аммарив мунияр махъ зана къаикIайсса куццуй гьалак уккантIиссар ва дунияллийгу, ахиратравугу.
Мунияту аьркинссар жулва циняв ишру Аллагьнайн ﷻ тапшур буван, тай халкьуннал зарал буваннинма хьхьичI. Цалва иширттал бакIрайва Аллагь Тааьланайн лабизлазиминнан Заннал дацIан дурсса низам мукунссар. Му ххуллу бугьи, му кьимат лахъсса мусири, муниву бигьашивугу дуссар. Мунил кумагчигу ссавурди.
«СалихIминнал тIабиаьт» тIисса луттирава
