Багьа бакъасса неъмат
Аллагьу Тааьланал инсаннан дуллуса ца ттеркьюкьи – аькьлу хъанахъиссар. Аькьлу буну цалва оьрму бутлатисса инсаннаща бюхъайссар малаиктураяр лавайсса даражалийн иян, аькьлу бакъашивруллив, му хIайвантрал даражалуяр ялавай утайссар. Ца аьрабнал шаэрнал увкуссар: «Аллагьнал лагънан яла хъинмур – аькьлури, мунияр ларайсса хъиншиву дакъассар». Ца-ца чIумал аькьлу бакъашиврул цIаний инсан лагма-ялттуминнан бакъасса, цанмагума хайр биян бан къабюхълай личIай, масъала, алкоголиктал, наркомантал.
Аькьлу бусса дуснал насихIатрайну инсан бюхъай мюнпат бусса элму лахьлан, хIакьсса устазначIан лавгун тIарикьатрал ххуллий ацIан. Мукунма, дуснал кумаг банссар ХIажлив гьан, мизит, мадраса бан, Аллагь ﷻ рязисса ххуллийн тIайла увну абадлийсса талихIрайн уцин. Жунма хIакьину му хъинну аьркинсса зат бур…
Абу Хатам тIий ивкIссар: «ДакIнил ва рухIирал дарувнугу, хъунисса имамтурал ярагънугу, Ахиратравусса талихIрал гьаннагу хъанахъиссар аькьлу». Ялагу ганал увкуссар: «КуртIсса аькьлу бусса инсаннал лажин ккаккан ххуйсса дакъанугу, му диялдакъашиву щинчIав хIисав къахьун бюхъайссар, амма лажин цуксса ххуйсса дунугу, аькьлу бакъасса ухьурча, му ххуйну чIалан къаикIайссар». Ва зат хIисав хъанай бур хIакьинусса кьини жулва инсантураву. Инсаннал аькьлулул даража кIул бан шайсса лишанну дуссар: аькьлу бума хайр бакъасса хавардугу къабуслай, гьарца буллусса суалланухьхьун пикри бувну жаваб дуллай уссар. Жунма чIявуну ххал шай, ци-бунугу ца суал буллусса чIумал, аькьлу-кIулши чанма жаваб дулун анавар уккайшиву, аьлимчуврив жавабрал ялув пикри буллай икIайссар. Аькьлу бума икIайссар цалла диялдакъашивуртту кIул дан хIарачат буллай. Учала буссар «Цавурасса диялдакъашивуртту ххал къашайманан цаманал лавайсса даража хIисав къашайссар», тIисса. Аькьлулул гьану цири куну цIуххирча – ци-бунугу ца иш хьуннин, ганил ахирдания пикри баву. Аькьлу бума хъирив лаян къашаймунил хъирив къаагьайссар, бан къашаймуниха зун къаикIайссар, думургу пайда бакъасса чулиннай харж къадайссар. Амма гьарца затрал душмантал буссар, мукунма, аькьлулул душмангу хъанахъиссар инсан цаятува цува рязишиву (оьжбу). Цанчирча, аькьлу буманан кIулссар гьарзад цачIара думур Аллагьу Тааьланаясса душиву. Мунияту му уссар гьарца ишираву ссавур дуллай, лагма-ялттуминнаха хIурмат буллай: гъан-маччаминнаха, чIаххувраха, кулпат-оьрчIаха. Мукунсса муъминчув тачIав къааьвкьинтIиссар. Аьрщараву кIучI бувсса гьанна ххяхлай ялун ливчуну бачайсса кунма, цалва аькьлу ккаккиялун ялун личин къабайманаягу хъунмасса хайр бикIайссар.
Ца аьлимчувнал увкуссар: «ТIарикьатрал агьулданущал дусшиву дурукун, ттун бувчIуна махъ учиннин, ина ганил заллу ушиву, учайхту, га махъ вил заллу бушиву». Циняв бур аькьлу бумину бикIан ччай, амма дунияллул неъматирттал хъирив багьаврил цIаний цалва мурадирттайн биян бюхълай бакъар. Аллагьу Тааьланал жува аькьлу буминнавух ва аькьлу мюнпатсса ххуллий ишла бувайминнавух хьун баннав! Амин.
