Лакку мазрайсса мавлудру

Лакку мазрайсса мавлудру

Мавла я салли ва саллим даиман абадан Аьла ХIабийбика хайрил-халкьи куллигьими.

Кьурайштал цайн учайсса
Тухумдалул Аьбдуллагь
Аминатлул лас хьуну
Маккалив цув лявхъусса.
Мий кьурайшнал хантурал
Хъиннува къума увну
Мадиналив цув лавгун,
Равзалуву увччусса.
Пар тIисса лажиндарал,
Гьайбат дусса чурххирал,
Лахъи-кутIашивруву
Бакьин бувсса базурдал.
Урувгманан нач шайсса,
Яруннил жавгьар ххуйсса,
Ххуйну чивчу «нун»-нияр
ИттацIантту ххаллилсса.
Алжаннул читIулнияр
КьацIливу маз пасихIсса,
Буллалисса ихтилат
Нагь-ницIнияр нахIусса.
ХъункIул тIутIинияргу
ЧIавру хъинну дюрчIусса,
Мусил чIатIаракIнияр
Чурххал кьамат тIайласса.
Чурх марххала кунмасса,
ЧIара щекьи куннасса,
ЧIири хъиннува ццунсса,
ХIаллу чиллай кунмасса.
Бургьилнияр нур цIакьсса,
Лув лухччи чанна дайcса,
Цалла бурхIал махъсса зад
ХьхьичIмур кунна ххал шайсса.
Яру шану гьарчагу
ДакI шанан къадикIайсса,
Цуксса шанай ивкIнугу
Цув чаклин къаличIайсса.
Мунал чурххал гьухъал кьанкь
Мискиралнияр ххуйсса,
Цув авчусса ххуллийгу
Haxlyсca кьанкь дикIайсса.
Цал мунал ка дургьунал
КаницIа кьанкь дикIайсса,
Мунал ка лавсса оьрчIру
ЛичIий буван бюхъайсса.
Дуки-хIачIия чансса,
Ккаший ссавур хъуннасса,
Ккаши-мякь цIакь хьурчагу
Шанарча цув уччайсса.
ТакIуйрагу инсаннан
Мунал хIадас къаккавксса,
Му ХIабибнал оь хIавчIма
ЦIарая ххассал шайсса.
Адам идавсил наслу
Инсан цув ухьурчагу,
Мунал ххирасса базу
Нурдания лявхъусса.
Идавсну тIайла аву
Махъва-махъ ухьурчагу,
Мунал нурдануяр хьхьичI
ЦикIуй ляхъан къадурсса.
Маржан дянив лаххарча
Юсру ххуй шайсса кунна
Цув дянив икIаврийну
Идавсталгу ххуй хьусса.
Расултурал ххуттаву
Лелуххантраву тIавус,
Цанявппа халкьуннаву
СубхIандалийсса маржан.
ТалихI бакъа кьавмдалун
Цанал нур ххал къашайсса,
Сааьдатирал агьлу
Цал нурданул буччайсса.
Иблисрал шакьаватру
Загьир дуван чIун хьувкун
Адамлул чурххавусса
АхIмадлул нур кьюлтI дуври.
Иблисирал яруннин
Мунал нур ккаркссания
Му ссят суждагу бувну
Мунайн мютIий хьунссия.
Му ХIабибнал чанна нур
КIучI дувну къадиркIния
Ибрагьим-Халиллуйнгу
Намруд мукIру хьунссия.
Мусал базурдавусса
Му МухIаммадлул нурду
Шакьават гьарза хьуну
Фиръаьвннун ххал къавхьури.
Пардав хъинну ганзну тIий
Аьрифинтуран дакъа,
Халикьнал чаннасса Нур
Халкьуннан ххал къашайссар.
Му Заннал Нурдания
Цал аслу ляхъан бувсса,
МухIаммадлул ххуйшиву
Аьрифтуран кIулссари.
Аьсив хьуминнал чурхру
Шафааьтрал шюшайсса,
Цалва уммат ххассал бан
Хъинну кумаг бантIисса.
Уммат къуману бивтун
Алжан тIалаб къабайсса,
Аллагьнал хьхьичI авцIуну
АьтIий маоь бантIисса.
Бунагь гьарзану бувну
Чапал хьусса арамтал,
Кавсарданийн бувцуну
Шювшуну марцI бантIисса.
Цайми идавстуралгу
ХIажат тамам дантIисса,
Цанявппа малаиктал
Мунахь «Аман» тIунтIисса.
РахIман Заннал ххазина
Цал канил бачIинтIисса,
Аьрасатирал кьини
Гьарзад цахь дикIантIисса.
Алжан ва дужжагь бачIин
Ихтияр дулунтIисса,
Инжил-Тавратираву
Цал сифат баян дурсса.
Цанявппа идавсталгу
Цах аьшикьну ливтIусса,
Кьиямасса кьинигу
Шафааьт чIа тIунтIисса.
Нажагь ХIабиб ккаккарча
Ттулгу ссалам буси тIий
ИвчIайнал махъ личIайнахь
Васият буллай бивкIсса.
Кулпат ккашилну бивтун
Ккашилнай цIими байсса,
Бутта акъа ятинтал
Бувцуну ябувайсса.
Цала мулк хьусса инсан
Му ссят ххассал увайсса,
Арамтурайн сси бивзун
ТакIуй гъалгъа къабайсса.
Ссавруннах уругарча
Му ссят рахIмат бувайсса,
Занай ивкIсса аьрщарай
Щин-щаращив гьарзасса.
Му ххирасса ХIабибнал
Мавлуд мазрал кIицI ларгун
Анавар цан къашару
Му ХIабиб рязий уван!
Салават гьарза дувну
Маоь цан къабувару,
Залзала дагьсса кьини
Зунма шафааьт биян!

Мавла я салли ва саллим даиман абадан Аьла ХIабийбика хайрил-халкьи куллигьими.

МукьцIалла шин ХIабибнан
Камилну тамам хьувкун,
Махлукьат ляхъан бувнал
Идавсшиву дуллури.
Лафзру жавгьар кунмасса,
Мяъна хъинну нахIусса
Кьуръан лавсун Жабраил
МуначIан занан ивкIри.
Чапуртал нигьачIийсса
Гьайбат Идавсил дия,
Инсантал хIайран шайсса
Мюъжизатру гьарзая.
Мюъжизат вин къагьарив
Ттуруллул ххют дуваву?
Мунал карамат гьари
Чурххал ххют къадикIаву.
Гъазаватирдай дирсса
АсхIабтурал щавурду
Му ХIабибнал ках дувну
Цимирагу хъин дурди.
ХIабибнан хIадур дурсса
Жабирдул чансса дукра
АхIмадлул ка дирукун,
Азаруннан гьа хьури.
Цал хIачIан къагьахьунсса
КIияма буцIинсса щин
Му ХIабибнал ка щуркун
Аьрал щинал бувччури.
Давуд ва Сулайманнул
Ханшиву хъуннанугу,
Валлагьи, му ХIабибнал
Гьайбат зиядассари.
Зурул архну унува
Душмантал нигьал байва,
Циксса ми бухьурчагу
Хъинну нигьа бусайва.
Якьублул арс Юсуфлун
Ххуйшиву дуллунугу,
Биллагьи, му ХIабибнал
Ххуйшиву ххишалая.
Бургъи-зурул нурнияр
ХIабибнал нур гьарзая,
Нурдания лявхъусса
Малаиктал нач шайва.
Амма гьайбат-жалалат
ХIабибнаву цIакь хьуну,
Инсантурал яруннин
Щалла жамал къаккавкри.
Машрикь-Магърибуллаву
Зулкьарнайн хан хьунугу,
Таллагьи, му ХIабибнал
Ханшиву ялттуссари.
Аллагь акъасса гьарзад
Цанал аьзалну хьусса
ХIабибнал даражалийн
ЦукIуй хан къаивссари.
ПасихIсса аьрабитал
Дяъви бан нигьа бувсъсса,
Аьжаибсса хIикматру
Мяънарду баян дурсса.
Буклай даим хьуссаксса
Мазрай нахIу лачIайсса,
Дуниял-ахиратрал
Хавардай гъалгъа тIисса,
МухIаммад ивчIарчагу
Абадлий личIантIисса,
Кьуръандалун лавхьхьусса
Мюъжизат щин дуллури?
Буклай даим хьуманал
БакIрай таж бишин тIисса,
Ца хIарпирал чиригу
АцIуннийн лахъан байсса.
Кьуръан буклакисса оьрчI
Нитти-буттан личIарча,
Алжаннул ххира хялат
Заннал мийннан дулайсса.
Дужжагьирал цIарал хьхьичI
Пардав хьуну бацIайсса,
СиратIирал ламулий
Нур хьуну занантIисса.
Хъинну цIансса гьаттаву
Чирахъну лякъинтIисса,
Чара бух лавгсса чIумал
Инсан ххассар антIисса.
Къашайманан даруну,
Бунагьирттан дарманну,
Умматиннан ссайгъатну
ХIабибнал махъ кьабивтсса.
Цала ххира ХIабибнайн
Салат дутира куну,
Халикьнал амру бувну
Аят ливккун буну тIий,
Му амру тIайла буван,
Заннайн мютIину бикIан,
Ххуйну салат дутира
БатIхIаирал саййиднайн.

Мавла я салли ва саллим даиман абадан Аьла ХIабийбика хайрил-халкьи куллигьими.

Му ххирасса Идавсил r
сиярду вихь бусларча,
Адаминал оьрмулий
къуртал дан къахьунссари.
Цинярда мюъжизатру
чагъарданий чичларча,
Баян бувну ми чичин
таптарду къагьассари.
Инсанталгу ва жиндгу
жям хьуну бусларчагу,
Идавсил r ххирашиву
тамам дан къахьунссари.

Мавла я салли ва саллим даиман абадан Аьла ХIабийбика хайрил-халкьи куллигьими.

Мяънавийсса, хIиссийсса,
аьризийсса, затийсса –
Циняв табиаьтирттал
ххирами цачIун дурма.
Малаикнал ххядурккун
чурххавату дакI лавсма,
Жибриллул мугьру бивщун
дакI сиррулул дурцIума.
Дянивсса чурххал заллу,
бургъиял лажин ххуйма,
ЯтIул кIялашивуртту
рангиравух хIалама.
Аьрабрай гъалгъа тIима,
аслурду хъинну марцIма,
Гьашимий кьабилалул
Кьурайш насабну хьума.
Я Аллагьнал мушаффиъ,
даим леххаву винни,
Ахир Кьияма кьини
бува ина шафааьт!
Кулпатрал захIматшиву
жуйн дурксса кьинилуву
Аман вийнни, я Расул,
бува ина жу нажат!

Мавла я салли ва саллим даиман абадан Аьла ХIабийбика хайрил-халкьи куллигьими.

Му ххирасса ХIабибнайн
цал салават дутарча,
РахIман-Аллагьнал жуйнна
ацIийла дутайссари.
АцIийла жура дуртун
ХIабиб рязи уварча,
Халкь ляхъан бувнал жуйнна
 ттуршилла дутайссари.
Эшкьилийну дутира
 МухIаммадлуйн салават,
Аман тIий тIалав бара
му ХIабибнал шафааьт.

Мавлудрал луттирава