Аькьлукартурал махъру
МухIаммад Идавсил ﷺ асхIаб Аьбдуллагь ибн Масъоьдлул увкуну бур: «Халкьуннал учай ххаллилсса махъру. Махъру ва тIуллу цасса инсанни талихIрайн уккантIисса. Махъру тIуллаха къалавхьхьума – аьй дуван лайкь хьумари».
Аьбдуллагь ибн Аьмрдухьхьун ца инсаннал буллуссар джигьадрал хIакъиравусса суал. «Цал вила нафсиралсса бува. Ганийн данди укку, ганищал талатаву дува!» - увкуссар Аьбдуллагьлул.
Аьбдуллагь ибн Аьббаслул увкуну бур бусурманнал цашиврул хIакъираву: «Ттун нава ччива цачIунсса жяматраву цIу канай, куннайн куннал зид бувгьусса жяматраву нацIу-кьацIу канайнияр».
Аьбдуллагь ибн Масъоьдлул увкуссар: «ДучIи дакъасса тIуллу дуллалаву ва адав дакъашиву, мяърипат ва инсап духлагаву, чIаххуращалсса арарду зия шаву – Кьиямасса кьини гъан шаврил лишаннури».
Абу Дардал увкуну бур: «Элму тIалав дувара (лахьхьияра) гай духлаганнин. Элму духлагайссар аьлимчу дунияллия лавгукун. КIулманан ва лахьлахьиманансса чири архIалссар».
Аьбдуллагь ибн Аьббаслул увкуну бур: «Вила гьалмахчунал (дуснал) диялдакъашивуртту кIицI лаган дакIнин багьсса чIумал, цал вилами диялдакъашивуртту дакIнин дича».
Бусурманнал халиф Аьли ибн АбутIалиблул увкуссар: «СалихIсса даву – так Аллагьнаясса ﷻ чирилийн хьул бивхьуну дувмурди».
Суфьян Саврил увкуссар: «Аьлимчу – ва умматрал духтурди, арцу ххирашиву – умматрал азарди. Мунияту, духтур цачIанна азар кIункIу дуллай ухьурча, цукунни ганаща цайми хъин буван хьунтIисса?»
ХIасан аль-Басрил увкуну бур: «Аькьилманал цала аькьилшиву кIучI къадувайссар, ганил хIакъираву бясгу къабувайссар. Мунал аькьилшиву халкьуннаву машгьур дувайссар: гайннал кьамул дуварча Заннайн щукру бувайссар, кьамул къадуварчагу щукрулийва икIайссар».
Фузайл ибн Иязлул увкуссар: «Муъминчунал (бусурманчунал) гъалгъа чанссар, давуртту чIяруссар. Мунапикьнал маз чIявуссар, дуваймур чанссар».
Имам аль-Бухарил увкуну бур: «Инсанная оьккисса махъ учаврия зарал бушиву (мукун учаву бунагьшиву) кIул хьуния махъ на тачIав щиятучIав оьккисса махъ къаувкуссар».
Оьбайдуллагь ибн Жяъфардул: «Цанма къакIулмунил хIакъираву хIукмурду (фетварду) буллалима – цIаравун (Дужжагьравун) ххяххан хIучI къаучайману ккаллиссар».
