Райондалул мавлуд
ЦIуминалийсса ЦIуссалакрал шяраваллил мизитраву хьунни МухIаммад Идавс ﷺ увсса зурун хас дурсса мавлуд. Ванийн цачIун хьуна щалвагу райондалиясса агьали.
Мажлис тIивтIуна бюххансса чIуний Кьуръандалул аятру бувккуну ЦIуссаккуллал имам Мажидов ЩейхахIмадлул. Гихунмай бачин бувуна Новостройрал имам Хаваев Мансурдул.
ХIайран хьунну мавлудру ккалай бия Чараваллал имам Маллаев Камил, ДучIиннал имам ХIусайнов Мурад ва Чапаево шяраватусса Мутаев Аьбдурашид.
Цалчин махъ лавхъуна Караман шяраваллил имам МухIаммадрасул Аьшикьовлул. Ванал дакIнин бувтуна мудан щукрулий бикIан аьркиншиву Аллагьнал ﷻ жува укун уздансса, ххирасса МухIаммад Идавсил ﷺ умматиннава бувнутIий. Бувсуна гьарца бусурмансса инсаннал бурж бушиву халкь хъинмунийн кIункIу баву ва оьмуния байщун баву. Имамнал бувсуна дакIнивату мунафикьшиву дуккан дан ччиманан мукьцIалва гьантлий мизитраву имамнал хъирив кIюрххил чак бан аьркиншиву.
ЦIуссаккуллал имам Щейх-ахIмад Мажидовлул бувсуна диндалул мажлисрава увксса инсаннал гикку бувсмур чанссавагу вив лавсун, цала оьрмулул ца аьдатну хьун бансса нанижат дуван аьркиншиву. Имам насихIат буллай ия Кьуръан тIайлану буккин лахьхьияра, хаснува сура «Аль-ФатихIа» («АльхIам») буккаву тIайла бувара тIий: «Жува гьарца чакливу «АльхIам» буккару, утту бишайни «Кьулгьу», «Фалакь-Нас», «Аятул-Курси» буккару. Амма цалчин къулагъас дуван аьркинссар жува ми цукун ккалай бурув. Лахъи дувайсса хIарпру лахъи къадуллай, кIилийнусса хIарпру багьайкун къаккалай дурккумуния мюнпат къахьунтIиссар. Хаснува «АльхIамраву» гъа-латIру бухьурча, щалва чак къахIисавссар». Мукунма, ванал бувсуна МухIаммад Идавсийн ﷺ салават дутаврил даражалуя: «Диндалул аьлимтурал луттирдаву чивчуну бур цукунсса-дунугу аьркиншиву хьусса чIумал салават чIяру дувара тIий: иширттаву, маэшатраву захIматшиву хъанай духьурча – салават гьарза дува, дакIнийсса мурадрайн иян ччарча – салават гьарза дува, дакI марцI дан ччарча – салават гьарза дува, Яла машгьурмур, сайки гьарца инсаннан кIулмур салаватгу «Аллагьумма салли аьла МухIаммадин ва аьла али МухIаммадин ва саллим» учавур.
Мизитравун бувкIсса оьрчIал ва душварал дянив бувуна МухIаммад Идавсихасса ﷺ наз-мурду дуккаврил конкурс. Гьуртту хьусса гьарца оьрчIан райондалул имамнал дуллуна арцуйнусса бахшишру. Мукунма, диндалиясса суаллу буллуну, тIайласса жавабру дуллуми оьрчIан ва душваран дуллуна каний дахIайсса ссятру.
Хъирив махъ лавхъсса ДучIин-нал шяраватусса Абубакар Аьлиевлул вяъза хас бувну бия МухIаммад Идавсил ﷺ чумартшиврун ва сахаватшиврун. «ХIадисраву увкуну бур: «Цадакьалул бунагьру лиххан байссар, щинал цIу лещан дувайсса кунна. Диндалул луттирдаву бувсун бур МухIаммад Идавсил ﷺ сахаватшиву хъинну лавайсса даражалийсса диркIшиву. ЦачIана чIа тIий увкIманан дусса хъусгу дуллуну, рязи увну тIайла уккайсса ивкIссар», – увкуна дурккучунал.
Мажлисрал ахирданий Новостройрайсса «Ас-салам» кказитрал вакил МухIаммад Оьмаровлул дуллуна дакIний личIансса бахшишру райондалул гьарца шяравусса цалва кумагчитуран.
