Гьаваллаву кумаг

Жула инсантал мудан куннал чIарав кув бацIан, кумаг буван хIадурну бикIай. Хаснува, инсан захIматсса иширавун агьувкун, ганай аякьа дуванми гацIана ялун бияй. Мукун кумаг бувсса иш хьуну бур уттигъанну Макка-Мадиналул мубараксса аьрщарая зана хьуну нанисса хIажитурал группалуву.

Хьусса иширая балжину жухь бувсунни группалул каялувчи, диндалул дурккучу, Муфтиятрал зузала МухIаммад Майрановлул:

«Жу Оьмралия (чIивимур ХIажлия) махъунмай зана хьуну най буссияв. Самолет щядикIан лагь хъанан дикIайхту, ца хъамитайпа хIалдания лаглан бивкIуна, ганил давление лагь хьуну диркIун дия. Му иш хIисав хьуну, чIарав щябивкIсса ганин маччасса душ нигьа бувсун, хъиннува хIалдания лаглай, эпилепсиялул приступ дайдирхьуна. Халкь гайннал лагма лавгун, кумаг бан ччай, амма ци банссарив къакIулну бия.

Гайнная арх бакъа щябивкIун бия кIива лакку хъамитайпа – Куматусса Аьлиева Басират ва Буттаева Гьажар. Басират зий бусса бур БахIикIлав фельдшерну. Самолетраву авара гьаз шайхту, га анаварну хIала бувххун, цал эпилепсия хьумунин кумаг бувну, цийнма цуппа бучIан бувна, Гьажардулгу ганин кумаг бувна. ЧIаравминнахьгу Басиратлул ци бан аьркинссарив бувсуна. Яла къашайшала щяв утту бишин бувну, цищалла диркIсса тонометр дуккан дурну, давлениягу ххал дурну, кIяла лавгсса хъамитайпалун дару буллуну, га хIалданийн бучIан бувна».

Жула миллатраву укунсса инсантал чан къахьуннав! Амин.