Лакрал кьинирду РувхIанийсса центрдануву

МахIачкъалаллал ва Каспийскаллал дянив Ися идавсил цIанийсса РувхIанийсса центр буллай зий булувкьуну бур. Гьаннайсса, халкьуннал стройка чинсса даражалий, сантирай ва лябуккулий най дур Центр буллалисса даву.

Шикку агьаммур объектнугу бикIантIий бур Мадиналийсса МухIаммад Идавсил ﷺ цIанийсса мизитраха лавхьхьусса мизит, цуппагу мукьра зивулийсса, цал архIал 23 азара инсан лагайсса, 57 метралул лахъшиврийсса 6 минарагу бусса. Мушакъатминнансса лифтгу, Дагъусттаннал тарихрал музейгу, фонтаннугу, патирханагу бикIантIий бур. Велосипедирттай, роликирттай бигьланччиминнан къулайсса кIанугу бикIантIий бур. Уттива чIявусса мурхьру бувгьуну бур, лагмаялттусса кIану щюллишиврувун бахьлаган буваншиврул.

Гьарца кьини стройкалий зий бур зунттал районнаясса шяраваллава, шагьрурдая, хIатта цайми регионнаягума бувкIсса агьлу. Ва мизит бувну къуртал буван бакIрайнласу бувну бур машгьурсса меценат, предприниматель Сулайман Керимовлул. Финансиртталмур иш дузалну бусса бур. ЗахIмат буллай, шаймур буллай, кумагру буллай бур Дагъусттан агьлугу. Шикку зунсса эстафета тапшур дурссар лакрал миллатрайнгу, июль зурул 4-ний зий байбивхьуну 18-ннийнин гьарца кьини 3-4 шяраваллил жяматравасса агьали шиккун букIлай, Аллагьнал ﷻ ххуллий цащара шайсса давуртту дуллай бия. – Лакрал агьалинал хьхьичIрагу ххуйсса гьурттушинна дурссар мизит бувавриву.

Ва ххуллухгу цанма чирилун, мажал бума, гъира-шавкь дума букIлай гьаксса захIмат бивхьунни. Дулланмургу чансса дакъая: чарил усттарнал пагьму буми чIиртту гьаз буллай бия, вайминнал щяв плитка дирхьунни, пагьлашиву дурунни, гьарцаннан дулланмур ляркъунни. ЦIусса мизитраву цалчинсса чак ччяни бувансса чIун гъан дуван кабакьу бувунни. Аллагьнал ﷻ хьхьичI чирину лякъиннав зу бивхьусса захIмат», – увкунни Муфтиятрал полпред Шамил БахIандаьлиевлул. Арамтал бакъасса, шиккун букIлай бия лакрал хъамигу. Зузиминнан дукра дуллай, мурхьирдаха къуллугъ буллай, лагма-ялтту марцIшиву дуллай хъинну чIарав бавцIуна.