ЦIУССА ХАВАРДУ

ЦIУССА ХАВАРДУ

ЦIУССА ХАВАРДУ

Сайфуллагь-кьадинал оьрмулиясса конкурс

Дагъусттаннал Муфтиятрал баян бувунни гьашину май зуруй «Шейх Сайфулла-Кади Башларов. Жизнь и творчество» тIисса лу кIулшиврул конкурс дувантIишиву, республикалул лагрулийсса. Мунил призовой фонд 1 000 000 къуруш дикIантIиссар.

Конкурсрал бикIантIиссар шанма шачIану (этап):

1. Цалчинмур бувантIиссар майрал 15-нний, конкурсраву гьурттушин дуллалими ялапар хъанахъисса кIанттаву (шяраваллаву).

2. КIилчинмур – майрал 22-ний шагьрурдай ва райцентрдаву.

3. Шамулчинмур – финал. Му бикIантIиссар май зурул 29-нний МахIачкъалалив. Конкурсраву гьуртту хьун бюхъантIиссар цинявннаща, мюрщи-хъуни къаувкуну. Балжину кIул буван бюхъантIиссар ва номерданийн оьвкуну: 8-988-293-09- 90.

Журналистътурансса пресс-тур

Апрель зурул цанний Ухссавнил Ккавкказрай ца яла хьхьичIунмунин ккаллисса Башларовлул цIанийсса медициналул колледжрал дурунни республикалул журналистътурансса пресс-тур. Ванил директорну ур ШавкIратусса ХIусайннул арс Маммаев Руслан.

Хъамаллуран ккаккан бунни колледжрал корпусру, аудиторияртту, кабинетру, симуляциялул центр. Экскурсия къуртал хьуну мукьах брифинграй журналистътурал суаллахьхьун жавабру дуллунни колледжрал директор Руслан Маммаевлул. Ванал бувсунни колледжран ацIнияхъайсса шинну душиву, хIакьинусса кьини, филиаллу хIисавравун лавсун, ххюазарунния ливчусса студентътал дуклай бушиву, миннавагу шаназаруннийн бивсса – МахIачкъалалив. Колледжрал филиаллу бусса бур Каспийскалий, Дарбантлив, Избербашрай, Хасавюртлив ва Къизлардай. Лахьхьин баврил мукьра направление дур: «Сестринское дело», «Лечебное дело», «Стоматология ортопедическая» и «Акушерское дело». Студентътал практикалий республикалул азарханардайн гьан бувайсса бур. Колледж къуртал бувну махъгу, Дагъусттаннай, цайми регионнай зийгу, тIалавнугу бур, цаягу выпускник даву дакъа къаличIайсса ур. Ххалаххив ва цаймигу процедурарду буван лахьхьин буллалисса центр бур. Ва кIану хIисавравун лавсун, колледж республикалийсса медициналул кIулшивуртту дулайсса учреждениярттаву хьхьичIунминнувух бур. Директорнал бусаврийн бувну, вайнначIа бур Аьрасатнал медициналул электрон библиотекарттаву ца яла багьлул ххирамур.

«ЖучIа дуклакисса гьарцагу студентнаща мюнпат ласун шайссар электрон библиотекалувасса циняв луттирдая, журналлая. Жу гьарца чулуха итххявхсса пишакартал хIадур буван хIарачат буллай буссару», – увкунни Руслан Маммаевлул.

Зумарду кьамул даннав!

Дагъусттаннал Муфтий шайх АхIмад-афандинал барча бавуртту

Ас-саламу аьлайкум ва рахIматуллагьи ва баракатугь! Ххирасса уссурвал ва ссурвал! ДакIнихтуну зу барча буллай ура Зумаритавал байрандалущал. Ва мубараксса кьини щаллу хъанахъиссар Рамазан зурул зумарду дугьаву. Цумацагу бусурманчунан ва ляличIисса кьинину ккаллиссар.

Рамазан зурул мутталий щала дунияллул бусурман бия цала чурхру дуки-хIачIия чан даврийн аьдат буллай, ссавур дуллай, Заннайн щукрулий, хъинбаларду буллай. ЗахIматсса чIун душиврух къабурувгун, жуватува чIявуми ва зуруй цадакьарду буллай, зума дургьуминнан дукия хIадур дулллай бия. Аллагьнал ﷻ кьамул баннав гьарцаннал бувмур, гьарзасса чири булуннав.

Мукунма, циняв шагьрурдай, щархъаву халкь цачIун хьуну ифтIарду дуллай, зумарду ритлай бия. Му хъинну ххарисса иш бур, цанчирча, мукунсса мажлисирттал жула дянив цашиву, уссушиву, диндалухсса ва ватандалухсса ччаву цIакь дувайссар. Диндалия, багьу-бизулия, оьрмулия ихтилатру буллалисса мажлисирттая мюнпат хъинну хъунмассар. Дазу-зума дакъасса щукру Заннайн, жунма вай барачатсса гьантри ккаккан нясив бувсса. ЯлунчIилгу Рамазан барз лайкьну хьуна бакьин Аллагьнал ﷻ кабакьиннав.

Аллагьнал ﷻ кьамул даннав жула зумарду, таравихI-чакру, ссахI ва цаймигу хъинбаласса давуртту. Заннахь чIа тIий ура ва зуруй дурсса дайдихьулул цIу лещан къадиртун, щала шинал мутталий хIарачатрай хъинбаларду, чири бусса давуртту дуллансса кьудрат. Куннал чIарав ку бацIияра, бюхъайсса кумаг буллали. Мубараксса Рамазан барз жула бунагьру багъишла битаврил, бала-апатIирттая, питнардая, дяъвирдая буруччаврил сававну хьуннав, захIматсса иширттавун багьминнан Аллагьнал ﷻ ссавур дулуннав, оьмур жуятува арх буваннав! Амин.

2026-02-01 (Шяъбан 1447 ш.) №2.


Аллагьнал ﷻ рязишиву

Аллагь цаятува рязи хьуну къаччисса бусурманчу акъахьунссар, цанчирча инсаннал талихI мунивур бусса. Мунияту жува хIарачат бувару хъинсса тIуллу, хъинбаларду буллан. Шикку кIицI лаганну Аллагь Тааьланан ххирасса 10 аьмал.   Оьмур лиххан байсса хъинбала. Идавсил ﷺ увкуну бур:...


Аькьлукарнал насихIатру

Ттизаманнул Сириянал диндалул аьлимчу АхIмад Шарифлул бувсун бур укунсса бусала.   Ца инсаннал цIувххуну бур аькьлукарнахь: «Инсантураву яла махIатталмур цумур хасиятри?» Аькьлукарнал жаваб дуллуну дур: Инсантуран оьрчIшиву бизар хьуну, анаварну хъуни хьун ччан бикIай, амма...


Заннал неъмат

Гьарца кьини инсан хьуна акьлай ур микробирттащал. Гайннуву чансса бакъар цIуцIавуртту, азарду сукку дувайссагу. Мукунсса микроорганизмардащал талан Аллагь Тааьланал ляхъан дурну, инсаннал чурххаву дирхьуну дур иммунитет.   Ттизаманнул хъиривлаявурттайн бувну, дунияллийсса халкьуннава...


Суал-жаваб

Щинавун оькьлакьисса инсан ккаккарча, га ххассал уваншиврул зума зия дуван бучIиссарив (щинавун ххяххарча майравух ягу кьацIливух щин духхан бюхъай)? Оьвкьуну нанисса инсан ххассал уваншиврул зума зия дуван ихтияр дуссар, ялунгума, чара бакъа ххассал уванмур буван аьркинссар. Амма мукун лирчIсса...


Мубараксса барз

Рамазан зурул даража Рамазан зурул хьхьичIра-хьхьичIсса хьхьу дуркIукун, Алжаннул хьулурду тIивтIуну, му барз гьаннин къалакьайссар. Дуржагьрал хьулурду лавкьуну, му барз гьаннин къатIитIайссар. ЩяйтIантал байщун бувайссар, иблислуй къатIа бишайссар. ЛивтIумий ххари шайссар, уттавамий рахIат...