ЦIУССА ХАВАРДУ

Имамтал ттуплий бувккунни

Уттигъанну Дагъусттаннал Аграрный университетрал спортзалдануву хьунни Муфтиятрал ва миллатирттал политикалул ва диндалул иширттал вазирлугърал кабакьаврийну сакин дурсса, диндалул зузалтрал дянивсса волейболданул турнир. Турнирданул хъамалну бия Муфтиятрал председатель Шамил Аьлиханов, Муфтийнал хъиривчутал МухIаммад Майранов, Аьбдуллагь Аджимоллаев, Идрис Асадуллаев, боксрал Олимпий чемпион ХIайдарбаг ХIайдарбагов, Дагъусттаннал волейболданул командалул тренер Кьурбан Ибрагьимов, Аграрный университетрал проректор Рамазан Камилов.

Ца кьинилул мутталий цалчинмур кIанттух бяслий дурккуна 12 команда. Турнирдануву гьурттушин дуруна Лакрал ва Ккуллал райондалийсса шяраваллал имамтурая сакин дурсса командалул. Миннал бувгьуна цалчинмур кIанугу. КIилчинмур кIанттун лайкь хьуна «Патриоты» тIисса команда, шамулчинмур шачIанттуйн гьаз хьуна «Эхогор». ХьхьичIунсса кIантту бувгьуминнан буллуна дипломру, медаллу арцуйнусса бахшишру ва хъунмур приз – кубок.

Спортсментурал батIаву

Декабрьданул 6-нний Муфтиятрал сипталийну хьунни лакрал спортсментуращалсса хьунабакьаву. Шикку бия дунияллул ва Европанал чемпионтал, хъунисса турнирдай ххув хьусса спортс-ментал ва миннал тренертал. Циняв кIицI лаглай бия цашиву, уссушиву, куннал ку чIарав бацIаву – чара бакъасса тIалавшинна душиву.

«ХIакьину жу хьуна бавкьуру лакрал миллатравасса цIа дурксса спортсментуращал. Жу цачIу щябивкIун тIааьнсса ихтилат буварду, куннан ку кIул хьуру. Укунсса мажлисирттал хъунмасса кIану бугьлагьиссар жула миллат цачIун бавриву», – буслай ур Лакрал ва Ккуллал райондал имамтурал каялувчи Шамил БахIандаьлиев. «Жул пикри бур укунсса батIавуртту ччя-ччяни дуллан, хъиннува чIявусса спортсменталгу бавтIун, мажлисру байсса аьдат дикIаншиврул», – тIий ия Муфтийнал хъиривчу МухIаммад Майранов. «На хъинну ххариссара укунсса батIавуртту дуллай бушиврия. Куннан ку кIулну, хIалану бикIан, иш багьний чIарав бацIан, цачIун хъанан аьркинссар, лак бакъасса цайми миллатругу», – увкуна «Горец» клубрал хъунама тренер Сухраб МахIаммадовлул.

Дунияллул чемпион Рамазан Рамазановлул кIицI лавгуна ялун нанисса спортсментурал никиран укунсса батIавурттая хъинну хъунмасса мюнпат бушиву. Лакрал жагьилтурал ккурандалул бакIчи МухIаммад-Маннар Бариевлул дакIнин бувтунни спортсмен цала цува увгьусса, чурххал гуж тIайласса чулинмай ишла буллалисса, жагьилтуран эбратрансса икIан аьркиншиву.

Щюллишиву – мизитрал лагма

Новостройрайн бизлазисса ЦIуссалакрал райондалул жямат бур цащава шайкун шяраваллаву багьу-бизулул занакьалашинну, рахIатну яхьунсса шартIру лащущаллу дуллай. Ца мукунсса даву хъанай дур халкьуннан мюнпат бусса мурхьру бугьаву. Уттигъанну ЦIуссалакрал шяравусса мизитрал аьрщарайгу бувгьунни мурхьру. Ва барачатсса даву дуван бавтIун бия щала райондалиясса агьали, Новостройрал имамтурал каялувчи Мансур Хаваевлущал ва ЦIуссалакрал шяраваллил имам ХIасан МухIаммадовлущал архIал.

«Мизитравун бучIайсса жяматрал ччянива буссия укунсса пикри, цанчирча, хайр бусса мурхьру бугьаву – чирисса, суннатсса, Идавсилгу ﷺ ххуйчулий ккаккан дурсса даву дунутIий. ХIукму хьуна халкьуннайн баян бувну, мурхьру машан ласунсса арцу цачIун дуван. Му куццуй 30-азарда къурушрайн дирсса арцу дартIуна. Мурхьру Нальчикрая бучIан бувссия: 24 туя, 7 ттарлил ва 2 щавщилул мурхь. Уттигу ахъулссаннул мурхьуру бучIантIиссар. Цинугу 40-луннийн бивсса мурхьру бикIантIиссар мизитрал лагма», – буслай ур ЦIуминалийсса шяраваллил имам.

Кумаграл кьини

Декабрьданул 19-нний кIицI лагайссар мюхтажминнан кумаг баврил кьини. Ва кьини щалагу дунияллий дувайссар мискинминнан ка-кумаграл акциярду. Мукунсса акция дурунни Лакрал ва Ккуллал районнай зузисса «Инсан» фондрал филиалданул ЦСОНдалул зузалтрал кумаграйну. Хъуни машинарду бувцIуну, кIивагу райондалийсса халкьунначIан дукихIачIиялул 1000 паёк биян бувунни, цинугу 400-хъул кулпатравун. Шикку гьуртту хьунни Муфтийнал хъиривчу Аьбдуллагь Салимов, Лакрал ва Ккуллал районнайсса имамтурал каялувчи Шамил БахIандаьлиев, «Инсан» фондрал филиалданул бакIчи МухIаммадХIабиб Къандалаев, Гъази-Гъумучиял имам Рамазан Рамазанов ва цаймигу шяраваллал имамтал. ЧIарав бавцIунни тамансса кумагчиталгу.

Рамазан Рамазановлул жухь бувсунни акция даврил кьастмурадрая: «Ванил ккаккан буллалиссар жува бушиву жула шяраваллил, райондалул жяматрай дакI цIий. Укунсса акциярду вания тихуннайгу дуллантIиссар, Иншааллагь. Цалчинмур ванил мурад – захIматсса тагьардануву ливчIсса жула халкьуннан кумаг бавури. КIилчин – каши дусса, кумаг буван ччисса инсантуран мукунсса сант дулавури. Шамулчингу дакIнин бутан ччива: цадакьа багьана хьуну, Аллагьнал ﷻ жуятува бала-апатIру, мусиватру арх бувайссар. Идавсил e увкуну бур: «Зула зува дужжагьрал цIараяту буруччияра, сайки бачIи чассаг цадакьалун буллуну».

Фондрал филиалданул каялувчи МухIаммад-ХIабиб Къандалаевлул барчаллагь увкунни акция дуван арцуйну, канийну, мукъуйну кумаг бувминнахь, чIарав бавцIуминнахь: «Укунсса иширттаву гьурттушин дуллалисса чIумал дакI ххари хъанан дикIай, цанчирча, гьар кIанттаватусса инсантал цачIун хьуну, цащава бюхъайсса кумаг буллан бикIай. Цинявннан хъунмасса барчаллагь!», – увкунни ванал.

ЛАЖИН ХIАДУР ДУРССАР И. ОЬМАРОВЛУЛ