Муфтий хьуна авкьунни лакрал интеллигенциялул вакилтуращал
Дагъусттаннал Муфтиятрал конференц-залдануву республикалул Муфтий шайх АхIмадафанди хьуна авкьунни лакрал интеллигенциялул вакилтуращал.
Ва хьунабакьаврил сиптачиталну бия Муфтиятрал зузала Шамил БахIандаьлиев ва ДГИ-лул преподаватель, философиялул элмурдал доктор Асият Буттаева. Ванил цилва ихтилатраву кIицI лавгунни республикалий чIярусса шиннардил лахъишиврий агьали, динну ва миллатру личIи къабуллай, куннал хIурмат куннал буллай яхъанай бушиву ЧIяву миллатру бусса ва динну чIярусса республикалий нахIуну, бавкьуну къуццу тIутIавриясса, жагьилтал рувхIанийсса ххазинарду хьхьичIунну тарбия бавриятусса, исламрал кIулшивуртту куртIгу, цIакьгу дуллан аьркиншивриятусса бия ихтилатругу, гьаз буллалисса масъаларттугу. Муфтийналгу кIицI лавгунни ялун нанисса никирахсса дагьайкунсса къулагъас, аякьа хIура дуккан ритан къабучIишиву. Бувсунни машгьурсса аьлимтал, шайхтал ва динчитал бусса лакрал миллатрал хIурмат цачIава личIинувасса бушиву. КIицI лавгунни НицIавкIратусса шайх Сайфуллагь-Кьадинал багьа бищун къашайсса кьиматрайсса давуртту дуршиву, ванал кьабивтсса мюнпатсса диндалул ва элмулул даража лахъсса бушиву.
– Ттун ххирар шайх Сайфуллагь-Кьади. Мунал аьраб мазрайсса ца даву дур 950 лажиндарайсса. Лу итабакьиннин жу ва дурккуссар ацIния кIийлла. Учин ччисса мура, ва мисал буцаврийну Сайфуллагь-Кьадинахсса ччаврил хIурматра ккаккан буллалисса, – увкунни Муфтийнал. Гьаз бувунни хьунабакьаврий «Сайфуллагь-Кьадинал оьрму ва творчество» тIисса луттирал конкурс даврил хIакъиравусса суалгу. Хьунабакьаврий гьуртту хьуминнал АхIмадафандинахь исламрал элмурду ва кIулшивуртту ларай дуллалисса пишакартал хIадур буллалаврихлу, коронавирусрал ппурттуву чIявусса инсантуран дуки-хIачIиялул кумаг буваврихлу барчаллагь тIутIисса ихтилатру бувунни.
ДГИ-лул теологиялул ва социал-гуманитар дисциплинардал кафедралул хъунама преподаватель ХIасан ХIасановлул пишкаш бувунни Муфтийнан цалва чивчусса лу, «Кьуръандалул маякру» тIисса. Халкьуннал шаэр Юсуп Хаппалаевлул луттирду буллунни шаэрнал душнил, «Зунттал хъами» тIисса журналданул редактор Аьжа АьбдурахIмановал. «Дараччи» фондрал хъунмур Гульшан Хасаевал буллунни Мариян Илиясовал оьрмулиятусса луттирду. Муфтийналгу хъамаллуран хIадур бувну бия ххуйсса луттирду. Мукунма ХIасан ХIасановлун, Гульшан Хасаеван, Тамара Закарьяеван, ПатIимат Рамазанован дуллунни чIирай лахъай ссятру.
