Пляжрайсса мизит

МахIачкъалалив шагьрулул пляжрай тIивтIунни хъун бакъасса цIусса мизит. Ца зивулийсса исвагьисса мизит 50 инсан чаклийн лагайсса бур. Хъаннин личIисса къаттагу, хьулугу бур.

Ва мизитрал хIакъираву укун бувсунни мизит тIитIавриха чялишну зий ивкIсса АхIмадлул арс Багьаутдин Рабадановлул.

– Жул вотсап группа буссар – 70-80 адимина, 30-нниха ливчусса хъами бусса. Цукунсса гьава бухьурчагу, гьарца кьини хьхьирийн батIайссару волейболданий буккан, щинавун бучIан. «Хьхьирил барцIру» тIисса цIагу дуссар жул ккурандалун. Циняв миллатирттал агьлу буссар. ХьхьичIва ца будка бикIайссия, жу таниву чак бувайссия. Лапва бух бувксса бур куну, будка бувкьуна шагьрулул администрациялул, жугу чак бансса кIану бакъа ливчIунав. Жу хъирив буклай, пляжрай чара бакъа чIиви-хъунсса мизит аьркиншиву бувчIин буллай буссияв. Масъаламур лахъи лаглай бия. Жу шагьрулул администрациялухь тавакъю бувссия, мизит жува буваннуча, так мизит бансса кIану булара куну.

ДакIнийхтунусса барчаллагь шагьрулул мэр Юсуп Умавовлун, уква буллунни мизит бансса кIану. Ца къуруш щилчIав тIалав къадурунни. Группалуву 20 шиная байбивхьуну, 80 шиная ливчусса агьлу буссар. ДартIун арцугу, дачIи шинал мутталий мизит бувну бацIан буварду. Мизит тIитIлатIисса кьинигу, агьалинан дакIний личIан, 3 къазан пулавралгу шавхьуну, волейболданул турниргу дуварду, хьхьичIун ливчусса командарттан (хъаннилсса личIину, чиваркIунналсса личIину) арцуйнусса премиярттугу дуллуну.

Шагьрулул мэр Юсуп Умавовлулгу кIицI лавгунни ва мизит шагьрулул рувхIанийсса культура гьаз даврил ххуллийсса даву душиву, маслихIат бунни скамейкарттугу бишин, чIивитIухъул цулцу буллансса столгу бишин, мюрщисса оьрчIал ниттихъал къулайшиндаран.

МахIачкъалаллал Имамтурал советрал хъунама Даниял Умаиловлулгу барчаллагь увкунни ва мизит баврил давривух гьуртту хьусса гьарца каснахь. Меценатътуран ва строительтуран буллунни Муфтиятрал цIаниятусса Барчаллагьрал чагъардугу.

Мизитрал имамну ивтунни МухIаммад Давудов.

ПатIимат Рамазанова