Бархъаллал Маллайл шеъри

"Мажму́аьтул-аьша́р" тIисса луттирава. Бишлашиссар луттираву бусса куццуй.

Бисмиллягьи-ррахIмани-ррахIим.

МарцIну вичIи дишара, я диндалул уссурвал,

Жула Сайид Идавсил сиярдалул бусаннин.

Арулдагу лухччигу, арулдагу ссавругу

Цахлуну ляхъан дурсса ХIабибуллагь МухIаммад.

Циняв аьламинтурайн Идавсну тIайла увсса,

Гьари аьжиз хьуминдан цIимилун ссайгъат увсса.

Арулдагу ссавнийсса ссаврундил малаиктал

МиндачIангу Идавсну жуна куна гьан увсса.

Гьари цаняв идавстал цанайн мукIругу хьусса,

Ахир Кьияма кьини шафааьт тIалав дурсса.

Цаняв ляхъан бувминдан цIимилун тIайла увсса,

Идавсил ххуйсса тIулдах ххуйну вичIи дишара.

Бадру-УхIудрай хьусса МухIаммадлул хIакьикьат

АьтIий, яру мукьал най бусанда, пикри бара.

Бадрулий гъазаватрай чан хьувкун тай чапуртал,

Цимирдал ми ливтIуну, ливчIун ур Абусуфьян.

Аьбдуллагь ба Акрамат, Абу Жагьа́лдул оьрчIру,

Сафвангу ахIал увну, Абусуфьян бакI уври.

Аллагьнал кабавкьуну ХIабибнал ливтIуцири

Маккаллал ханнахъаха аьтIий буя чапуртал.

Хханхри цIарал бувцIуну, цIарал лама най буя,

ХIабибнан макру буван кумаг тIалаб дуруна.

Цала дуцири хъуслил аьрал баян увкуну,

Да́ру-ннадватрайн лавгун, аьдлу-диван бувуна.

Бадрулий ливтIуминдал интикьа́м ласунду тIий,

ХIабашийтурал аьрал БатIхIаълив бучIан бувна.

Кинанат ва Тагьаммат Маккалиппай оьвкуну,

УхIудрайн хIадур хъанай ярагъ бахIлан бивкIуна.

Циняв ХIижа́з-аьрабтал СуфьяндучIа бавцIуна,

ХIабибуллагьнал хъирив цавагу къаавчуна.

Цаняв жагьилми хъандил ярагъругу бавхIуну,

Абусуфьяндул щарсса миндал бакIчи дуруна.

Ппухълу ливтIун къумасса Кьурайштурал илбистал

ХIабибнал аьралундан зарал буллан бивкIуна.

МутIэмлул арс Жубайрдул нажвалий гъалгъа бувну,

Цала канихьсса лагънахь ХIамзат ивчIа увкуна.

ТIуаьйм куну цайн чайсса Жубайрдул буттауссил

ХIамзат ивчIан тIалабрай ВахIшинахь гъалгъа бувна.

Ми хъунисса аьралду сайхатирай ливккуна,

Мадиналдал чулухсса ратIнил зума дургьуну.

Утти хавар бавуна ххира Заннал ХIабибнан

ХIисаб дакъасса аьрал ялун бувкIун бури тIий.

Бадрулий ливтIуминдал сси ласун цачIун хьуну,

УхIудрай ливккунди тIар хъунисса аьскарду тIий.

Цалва Исламрал кьюкьлуйн Идавсилгу оьвкуна,

УхIуд сабгъатрал хавар циняв бавтIун бувсуна.

Бадрулий гъазаватрай архIал къавхьуми вирттал

УхIудрай гъазават бан эшкьилул сукку бувна.

Гай бувцуну иян гьан ХIабибнангу бивзуна

Талатаврил санааьт дакъашиву кIул хьуну.

Ансартурал лергъ куна, асхIабтурал кьаст дувна,

ХIилму ххув хьусса Сайид УхIудлийва авчуна.

ХIабибнал макI бувсуна цалда чIарасса кьюкьлухь

Лиянссару увкуну Идавсил макI лирчIуна.

Къучагътуран ччимур бан хIурни ларххун авчуна,

Заннан ххирасса ХIабиб кьюкьлул хьхьичIун увккуна.

Ччан къабивкIун Идавсил иян ссапар бавхIуна,

Идавсил гьалмахтуран хъинну ччан къабивкIуна.

ТIайбатрал гъалбарцIтурал Идавсихь гъалгъа бувна,

Зана бикIансса хIилла хIаялий ккаккан дурна.

ХIурни ларххун кьаст дуркун лиян къадайссар куну

Зана ивкIун Идавсил хьуллу кьукьин бувуна.

Мадиналивсса вирттал нюжмардийн цачIун бувну,

ХIабибнал вяъза бувсун, дакIру кIюла дуруна.

Аллагьнал ялув бувсса гъазаватрал даража

Жавгьардал гъалгъа бувну цинявндахьба бувсуна.

Пашман хьусса тай рухIру дигьалаган дуруна,

МухIаммадлул барачат циняннайба бивуна.

(гихунмай хъиривмур номерданий бищунтIиссар)