ЦIУССА ХАВАРДУ

ЦIУССА ХАВАРДУ

Къатри пишкаш дурунни

«Ас-салам» кказитрал 11- мур номерданий бувсун буссия цIуминалийсса ЦIуссалакрал райондалий зузисса «Инсан» фондрал цачIун дуллай бушиву къатри дакъа ливчIсса кулпатран кумагрансса арцу. Уттигъанну фондрал каялувчи ХIажибуттаев Исламлул баян бувунни арцу датIаву дацIан дуршиву ва масала щаллу хьушиву.

Масала укун анаварну щаллу шаврил сававну хьуну бия хъинну ххарисса иш. КIул акъасса спонсорнал кIизивулийсса, 3,5 млн. багьасса къатри машан ларсун, Ушановхъал кулпатран пишкаш дуван фондрайн тапшур бувну бур. Къатрал кIулли Ушанов АьбдурахIманнухьхьун дуллунни Новостройрал имам Хаваев Мансурдул ва фондрал бакIчи Ислам ХIажибуттаевлул ва ЦIуссаккуллал имам ШайхахIмад Мажидовлул. Зурул мутталий фондрал цачIун хьусса 500 000 къурушгу АьбдурахIманнун дуллунни, къатри аьркинмунил щаллу дуваншиврул.

«Кумаг бувсса циняв диндалул уссурварахь ва ссурварахь ва ттуна къакIулсса, жун къатри пишкаш дурсса инсаннахь барчаллагь тIий ура», – увкунни Аь. Ушановлул. «Къатри ларсманал цалва фарз биттур бувунни, цадакьа бувну цала хъус бала-апатIирттая мюхчан дурунни. Вила канихьсса, захIмат бивхьуну ляркъусса арцу цакуну цаманан дулун къабигьассар. Мукунсса тIул дуваншиврул дакIниву цIакьсса Иман дикIан аьркинссар», - увкунни И. ХIажибуттаевлул. М. Хаваевлул кIицI лавгунни захIматсса иширавун багьминнал чIарав бацIаврия, кумаг баврия хъинну хъунмасса барачат ва чири бушиву. «Кумаг бувминнан ва буван ччай бунува къавхьуну ливчIминнан Аллагьнал I цIимилийну талихIрайн букканнав, миннай ва миннал оьрчIай барачат бишиннав, цIуллушиву ва хIалалсса хъус дулуннав», - увкунни имамнал.

Агьамсса даву

Ноябрьданул 20-нний СумбатIуллал шяраву хьунни тазиятрал къатрал комплекс тIитIаврин хас бувсса мажлис. Ва бувансса пикри жяматран 3 шинал хьхьичI хьуну бивкIун бур, амма личIи-личIисса багьана-сававру хьхьичIун дагьлай, проект так чагъарданий лирчIун диркIун дур. Комплекс щаллу баву гьашину интту Амучи Михайлович Амутиновлул цайнма лавсун бивкIун бур. Мунияр махъ кутIасса чIумул мутталий даву щаллу дурну дур.

Мажлисрайн бувкIун бия тамансса хъамал: Ккуллал райондалул имам ХIабиб Батталов, МахIачкъалалул Ленинский райондалул имамтурал советрал председатель МухIаммадрасул МахIадов, СумбатIуллал шяраваллил администрациялул бакIчи Рамазан Бугъаев, 2-мур ЦIувкIуллал администрациялул бакIчи Казбек Аьбдулкаримов, Артур Амутинов ва шагьрурдай ялапар хъанахъисса СумбатIуллал жяматрал вакилтал. Мажлисрай лавхъунни махъру, бувсунни вяъза-насихIатру, дурккунни мавлудру.

Укунсса тазият шяраву бушиврул агьамшиву хъинну хъуннассар, цанчирча шиная шинайн шяраваллаву халкь чан хъанай, къатри лякьапIякьу хъанай, бивкIу буччаврил аьдатру лайкьну тIайла дуккансса сант гьарначIа дакъар. ЦIуну бувсса комплексрал бигьа бувантIиссар мукунсса аьдатру щаллу даву.

Мадрасалун кумаг

Гъази-гъумучиял шяраву зий буссар дукIу тIивтIусса мадраса. Шиву дуклай бур личIиличIисса районнаясса студентътал. Мадраса зузи буван хъунмур ка-кумаг хъанай бур халкьуннал буллалисса цадакьарттая. Аммарив, укун хъунмасса идара зузи буван уттигу тамансса харжлугъ аьркинну дур: дуклакисса мюталимтал дукан-хIачIан буван, муаьлимтуран, завхознан, поварнан харж щаллу буван ва цаймигу чара бакъасса кIанттурдай ишла дуван. Мунин бувну, баян буллай буру Гъумучиял мадрасалул аьркиншивурду щаллу дуван арцу датIлай бушиву. Кумаг тIайла буккан бюхъантIиссар банкрал карталийн 5228 6005 9673 8387. Карта дарзуну дуссар телефондалул номерданийн 8-967-933-91-11 (АьбдурахIманов Тажудин Шахбанович). ЦIуххубусу буван ччиминналгу ва номерданийн оьвчияра.

Лакку мазрайсса луттирду

Уттигъанну цIуницIа ита бавкьуну бур лакку мазрайсса диндалул луттирду: «Мавлуд. МухIаммад Идавсил e узд а н ш и в р у я » ва «Диндалул фарзру». Вайннуву бур цумацагу бусурманчунан чара бакъа кIулну бикIан аьркинсса Исламрал аслу-гьанурду. Луттирду бахлай буссар Исламрал кьай даххайсса ттучаннаву. Мукунма телефондалувух оьвкуну тIалав буван бюхъантIиссар: 8-989-670-51-15.