Лакрал жагьилтал Тарки зунттуй
Лакрал жагьилтал Тарки зунттуй
Ноябрьданул 19-нний бигьалагай кьини мюнпатну гьан дуван, лечин, турникирттайн гьаз хьун, спортрал бяст-ччаллил тIуркIурдаву гьуртту хьун, лакрал жагьилтал Тарки зунттучIан бувккуна. Ва даврил сиптачитал бия Ккуллал райондалул жагьилтурал ккурандалул (ДРООлул) хъунама Гуйдалаев АьбдурахIман, Лакрал жагьилтурал ккурандалул хъунама Давуд Атаев ва ЦIуссалакрал жагьилтурал ккурандалул хъунама Минкаил Рамазанов. Спортрал тIуркIурдал дайдихьу Тарки зунттуйн лечавриясса дия, лечин увккун ия гъира бума, карчI дакъама.
Жагьилтурал сипталувух гьуртту хьуна Дагъусттаннал экономикалул министр ХIажи Султанов, Ккуллал райондалул имам МухIаммад-Маннар Бариев, Лакрал райондалул имам МухIаммад Майранов, МахIачкъалалул 49-мур школалул директор Аьбдулкарим Айгунов, Башларовлул цIанийсса медколледжрал директор Руслан Маммаев, жяматийсса ишккакку Зиябуттин ХIажимирзаев, цIа дурксса спортсментал, ишккаккулт, диндалул ва хIукуматрал къуллугъирттайсса вакилтал ва цаймигу.
Лечаву дуван бувкIмий кIюрххилва цачIун хьуна Тарки зунттулу. Гикку ушу-саньдалул Аьрасатнал чемпион Хъусращатусса МухIаммад Акаевлул каялувшиврущал разминкагу дурну байбивхьуна.
Тарки зунттуйсса спортплощадкалийн бивукун байбивхьуна спортрал бяст-ччаллу: турникрай лунттубакI лахъан баву, брусьярдай гьаз шаву, ва пут гьаз даву.
Жагьилтуран эбрат ккаккан дан шиккун увкIуна цIа дурксса Ккуллал шяраватусса гужлув Султан ХIусманов. Ванал ккарччал дургьуну гьаз дуруна 80 кило дусса гьиву. Мукунма, ккарччах кIункIу бувну бувккуна тIаннуй бивщусса загълунсса мяр.
Дяркъусса кьини гъели хьун шикку хIадур дурну дия кIирисса чяйлул самоварду. Спортрал бяст-ччаллаву хьхьичIунсса кIантту бувгьуминнан дуллуна арцуйнусса бахшишру ва грамотарду: 1-мур кIану бувгьуминнан – 3000 къуруш, 2-муних – 2000 къуруш ва 3-муних – 1000 къуруш.
ХIажи Султанов: ХIакьину шикку гьуртту хьунни мюрщисса оьрчIру, жагьилтал, оьрмулул бугьарами. Циняв цачIуну левчуру, дакIнивун хъинну ххуйсса асарду бивунни. Яла агьаммургу – жула ялун нанисса никиран лайкьсса эбрат ккаккан даву, спортрахун бичаву. Укунсса давуртту чIяруну дуллан аьркинни. Жямат куннан ку кIулну бикIан, цачIун хъанан, хъуниминнал мюрщиминнахь аькьлу бусан.
Аьбдулкарим Айгунов: На цинявннайн оьвтIий ура спортрахун багьияра, укунсса кIанттурдайн булухьхьияра. Спорт – жулва оьр-мулул ца агьамсса бутIар.
Зиябуттин ХIажимирзаев: Хъунмасса пахру бур жулва лакрал жагьилтурал дуллалисса авурсса давурттая. Лакрал миллатгу, жула сийгу гьаз дансса давуртту дуллалисса инсантал жулва дянив бухьувкун, умуд бур жула жямат, маз, тарих лайкьсса даражалий бикIанссар тIисса.
Руслан Маммаев: Барчаллагь ва даву хIадур дурминнан, лакрал жямат цачIун буллалисса, цIуллу-сагъшиву цIакь даврин кабакьавуну хъанахъисса жулва уссурваран. Жугу жула чулуха мудан хIадурссару вайннал чIарав бацIан.
Султан ХIусманов: На увкIра хIакьину шиккун ттунма кIулсса ца-кIива упражнения жагьилтуран ккаккан бан. Шиккун ттуйн оьвкусса Гуйдалаев АьбдурахIманнуйн барчаллагь.
АьбдурахIман Гуйдалаев: Ххуйсса мероприятие хьунни, на барчаллагьрай ура гьуртту хьун увкIсса гьарцаманайн, спортрахун машгъул шаврияр ххишала цамур ххуйшивугу дуссар укунсса давурттаву: жагьилтал цачIунмай буллалиссар, гъан буллалиссар. Циняв усурвал кунма чIарав бавцIунни.
Лечавриву 3-мур кIану бувгьуна Вихьлиясса ХIасанхIусайнов Рамазаннул, 2-мур кIану – ШавкIратусса Гъазиев Пашал, 1-мур – Хъусращатусса АхIмадов Шамиллул.
Турникрай 3-мур кIану бувгьуна Ккулатусса ХIажирамазанов Оьмарил, 2-мур – Хъусращатусса Акаев МухIаммадлул, 1-мур кIану – Хьуриясса Бариев МухIаммадманнардул.
Брусьярдай 3-мур кIану бувгьуна Ккулатусса ХIажирамазанов Оьмарил, 2-мур – ЧIяйннал шяравасса МухIаммадаьлиев Назимлул, 1-мур – Новостройраясса Тахтаров Мирзал.
И. Оьмаров
