Бугъ’ятуль сааьлук – Пакьирнал мурад

Бугъ’ятуль сааьлук – Пакьирнал мурад

(дайдихьу хьхьичIсса номердай)

Ца ашрапирттал чантай ма тIий лавсун учIарча,
Ца була тIий учIарча, личIи бан къабучIиссар.
Аллагьнайн щукру бувну цайнна хIажат дагьаврий,
Дула тIиманалсса хIакь ялагу хьхьичI аьркинссар.
Ва мизандалийн уца инава маъзун айма,
Ва мингьажрай ухьурча, мунийн мустахIикьссари.
Мунищалгу аьркинссар истикьамат ххал дуван,
Истикьамат дакъама маъзун ан къабучIиссар.
Вай на шикку бусайми хъинну цанма къакIулма,
Сиррулул бутIа бакъу – иршад дан махIалссари.
Муридналсса адабру миннуяр чIяруссари,
Адабрайну акъасса вусулгу къашайссари.
Шикку чара бакъами цаппара кIицI дуванна,
Вайннуй ина ацIарча, махъмигу дияйссари.
Адабрал хъунмур мури – цана цува кIулшиву,
Ци кIанттава увкссарив, цува чун гьантIиссарив.
БивкIу хIакьшиву кIулну ивкIунавух ккалли хьун,
Нафсирал муракьаба гьар чIумал аьркинссари.
Цала нафс кIулсса лагънан Занналссагу кIулссари,
Ссахлуну ляхъан увссар кIул шаву важибссари.
Халкь ляхъан бувсса Заннал улугьият кIул данни,
Мяъбуд кIул хьувкун лагънан эбадат фарз шайссари.
Пикри бувну ххал бува Заннал маснуаьтраву,
Мунин лавхьхьусса пикри вин цичIав бакъассари.
Гьар бурувгсса лахIзалув азарда хIикмат дуссар,
Аллагь цувалушиврин му бургьангу гьассари.
Миннул пикри там бувну, Аллагь кIул хьуну мукьах,
Утти миккун гъан хьунсса мяърифат аьркинссари.
Мяърифатрал хьхьириву гъаввас хьурча – аьрифри,
Мунийну хьу ихласрайн кимия учайссари.
Микку фатхIу шайссари Заннал фазлулул хьулу,
АьтIаърал къапу куну мунин цIа учайссари.
Заннал фазлу дуллуну мунивух уххан хьурча,
Микку кайп-бахт шайссари, мурад загьир шайссари.
Машиятну духьусса даират ирсну хьуну,
Асбаб-мусаббабатру муяссарну шайссари.
Вай хIукмурду бачин бан устар увгьуну мукьах,
Му адабрайну угьан муриднай ялувссари.
Цал щайх увгьуну мукьах насабран мустахIикьсса,
Авраъсса цама ур тIий, кьаитан къабучIиссар.
Аввалданий авраъма тIалаб даву ялувссар,
Щайх хьуну махъ кьаитан ххуллугу бакъассари.
Аввал марцI бан аьркинссар шариаьтрал ххуллурду,
Диндалулмур ахIкамру аввалданий марцI бува.

(гихунмайгу буссар)

Щайх Сайфуллагь-Кьади Башларовлул луттирава