Бугъ’ятуль сааьлук – Пакьирнал мурад

Вила вагьмулуяр ххув хьурча вил кьалбрал султIан,

Муршиднал хIукмулийну халват бан бюхъайссари.

Микку вин аьркинссари халватрал хьхьичI рияза,

Рияза марцI дуварча, халват нурну шайссари.

Ахлакьру тагьзиб дува, аза тахIаммул бува,

Микку халват хIакь хьунан кашфу загьир шайссари.

Аллагьнан лархьхьусса зад дикIан махIалшиврийну

Мивун уххайсса чIумал вил аькьд дикIан аьркинссар.

Даим зикру аьркинссар, гъапул хьун къабучIиссар,

Аллагь акъамур ххал дан рухсагу бакъассари.

Васиятру, адабру луттирдай бувсуну бур,

Миннул кIану ва бакъар, бумуний аьмал бува.

На шагьрурду ккуччу бав, халкьуннал синфру ххал дав,

Ттулмур якьин хьун ччарча, инарагу ххал дува.

Оьккиссагу ккавккунни, ххуйссагу ттун ххал хьунни,

Исламран салмат дайсса вай бур, ина ххал ба вай.

Камилшиврий дяъвалий, чалма-сурат ххуй дуллай,

Халкь цайнма мютIи бансса дуцайсса сивай.

Заннайн иман дишаврил сурат къакIулну дуна,

Миннал талкьин буллали задрай тамаша бувай.

Мискьала-зарралунсса камил иман дакъана,

Кашфу-караматирттал хавардах вичIи дувай.

Шайхнал карамат бусай щялмахру бакьин бувну,

ИчIунмайгу оьвкуну яла цаласса бусай.

Мунихлуну увкусса Имаму Раббанинал

Аллагь, Аллагь, арх уцу, ахир къатIун ина вай.

Мужадала мабара фукьагьау-шшаръирайн,

Агьлуллагьтурал ххуллий загьирданий буссар вай.

ХIадисрал агьулданийн иътикьад сахIихI дува,

Вайнная хьун жадд дува, хIакьсса варисталли вай.

Агьлул-каламраяту тавба дурну арх уцу,

Малъаьбату-щяйтIанни, агьма хъинну зия ай.

Таъвилдая яукку, илхIад зандакьатри ми,

Нажагьлий таъвил барча, бува марцIнал мангьажрай.

Загьирди, ва цири тIий мунийн инкар мадара,

Му шариънал мурадри, нафи кафирну увай.

Муташабигьатирттал табиъну махъанахъра,

Фитнарду тIалав давур таъвилдал хъирив агьлай.

Аллагь акъасса чувнайн таъвил къакIулссар куну,

Уруччу ацIаврия ва мазмундал хилафрай.

Вила замана кIулша, муаьмала ххуйну ба,

Виламур къапу лавкьун, ттуршама хьу вахIдатрай.

Ява хIала машара дуньяви кьавмдалущал,

ЖаварихIру бурувччун, фузулдай маацIара.

Аллагьнал нафахIатрайн ссунтI учин хIарачат ба,

Мунийн лавхьхьусса лаззат къалякъайссар вин луглай.

Вил дагьрулул кьинирдай Заннан ду нафахIатру,

Дуньяллуйн машгъул хьуну магьандара зиярай.

Нафсирал хIисав ласи виятура ласуннин,

Аькьубалий аьдат ба, халас шаврин тамахIрай.

Вина уруччин ччарча, Аллагь ина уручча,

Занная нигьа усу, даин хьхьичI лякъин ччарча.

Зал кIул хьун хIарачат ба неъмат вийва бунува,

МихIнатраву агьувкун инава кIул хьун ччарча.

Заннал вин къачивчумур вища ласун къашайссар,

Заннаяту тIалаб да ххуйсса аьмалданучIа.

Аьлам цачIун хьурчагу зарра хайр-шар вин буван,

Джаффал-кьалам хьуссари, бакъассар ссавур дарча.

Сабрулун насру дуссар, оьсрулун юсру дуссар,

Оьккимур ххуй хьунтIиссар, тамамну таслим хьурча.

Кьуват буни, жагьилни ина къадайсса жигьад,

Шайссарив вища буван хъинну хъунав шавричIа.

Тасаввуфрал залуннан шанна тIабакьат дуссар,

Мунийн хIал кIулша агьлул-басиратрачIа.

Муридун тIалиб чайсса сахIибул вакьтирайнни,

МутавасситI учайссар сахибул хIалданучIа.

Мунтагьа цIа учайссар сахIибу-ннафсирайнни,

Афзалмарив кIул шайссар нафас ккалли бавричIа.

Муриднал аьмал чанссар зунттурдуксса бунугу,

Аьрифналми чIявуссар, хъанайтIи му ЗанначIа.

Сулукран мубтадисса муридтал загьир шайссар

Цала аьмал ва вужуд мурад тIалаб авричIа.

Адабрал муназилду тIалаб дай мутавасситI

СахIибу-тталвинди му вайннал истIилахIрача.

ХIалдания хIалданийн тажжалийну таракъи,

Саликнай тахIвил шаврин эбаратри вайнначIа.

Мунтагьи василмари макаматру хIавз бувну,

МахIаллу-ттамкиндайри кашфу давам шавричIа.

МуначIан гъан хьурчари кьалбу итIмиънан шайсса,

ХIалдай тагъйир къаайссар унугу агьвалдачIа.

Щайх Сайфуллагь-кьади Башларовлул луттирава