Бугъ’ятуль сааьлук – Пакьирнал мурад
(дайдихьу хьхьичIсса номердай)
Фаризамур барт бигьин игьтимам хъинну бува,
Мунил нукьсан джабру дан нафиларттугу бува.
Ва заманнул халкьуннал нафиларттай джигьад дувр,
Фаризартту кьабивтун. Му гьавари, арх бува.
Идавсил ﷺ ссуннатирттай мулазама дурссаксса,
Цува увсса кунари, адабру адаъ бува.
Цува акъахьурчагу, хIукму – мукьах личIавур,
Ссуннат бивкIуну мукьах балалдайн кьарар бува.
Ссуннат куну учайсса ца чакливу бакъари,
Гьарца задрав аьмссари, буваймур кIулну бува.
МарцIми Заннан ххирассар, бюхъайкун марцIшив дува.
Чурх марцI бан ччисса кунна, яннагу марцIну дува.
ЧIявуну ккавкнал аьзаб кIущалданул дияй тIий,
СахIихIсса хIадис бури, марцI хьун хIарачат бува.
Нюжмар кьини гъуслу ба, хъинну мулазама хьу,
Даражарттал бусала хIадисраву ххал бува.
«Гъурру мухIажилинтал» иссаву ххуй дурмири,
Чаклин иссаву ххуй да, иссаву даим дува.
Ризвануллагь учайссар чIумуву бувсса чаклийн,
Фариза камил бува, аввал вакьтирай бува.
Бюхъарча мизитраву, къабюхъарча бювхъуний,
ЧIарах буккан къабивтун, чак жамааьтрай бува.
Ххишала-чанну дуллай бувмур зия къабувну,
Варид хьуми азкарду чаклил хъирив дулува.
Рукуъ-сужудрачIари вил бунагьру кьатI шайсса,
Сужда-рукуъ лахъи да, камилну хузуъ дува.
Аьмал чансса барчагу, даинмур мамдухIссари,
Аьмаллу ххуймур бугьи, бувгьумур даим бува.
Нафиларттайну гъан хьу хIакь Каримнал къапулийн,
Фарзирал жавабирттур Заннангу ххира шайсса.
Чаклин иссаврил ссуннат ивсутари булува,
Муний даим шаврийнур Билалгу хьхьичIун увксса.
Нафила учайсса чак ЗанначIансса ссайгъатри,
Муъминчунал аьркинни цала ссайгъат бан ххуйсса.
Афзалмуний лазим хьу, бюхъарча махъмигу ба,
Афзалшиврул важгьурду хIадисирттайнур бусса.
Дуниял дурцIу муси садакьалун дурссаксса
КIира ракааьт ратиба кIюрххил чаклил хьхьичI дайсса.
Ахттайн чаклил хьхьичI-махъ дай мукьра ссуннатсса ракаьт,
Мулазим ххассалшиву хIадисравун бавцIуссар.
Ахттакьундалул хьхьичIсса мукьра ракааьт дайма,
Мяйжанссар цIараяту мунал дикI хIарам дурссар.
Мунил шаъну хъуннутIий, фазила чIярунутIий,
СахIихIсса хIадисрайну варид хьушиву бувсъссар.
Ибну Оьмардуяту бавцIусса хIадис бури,
Ишаърал ратибалул фазилартту цил бувсъсса.
Абу Давуд, Тирмизи, Насаи, Ибну Мажагь,
Умму ХIабибатлуя риваятру бавцIусса.
Мунил ялув авцIунан бусса ажрулул кьадар
Лайлатул-кьадрилул хьхьу ихIяъ дурссакссар кусса.
Ялагу ххишала бур хIадисрал сахIихIмуний,
Аллагьнал мунан байссар Алжаннув къатта кусса.
Бургъищал байсса чаклин ишракьрал чак учайссар,
Муъминчунал суннатри, дакIру ишракь дувайсса.
КурчIил машара уссу, му фазила хIаз буван,
Мунил хIакъираву бур хIадисру ххишаласса.
Рубъу кьинилул ларгун, байсса зухIалул ссуннат,
КIинния байбивхьуну ацIния кIира дуссар.
Дунияллий гъаниймур давлатри щак бакъассар,
ЗанначIасса чирилул хIисаврагу дакъассар.
КIива-шанма бакъари, чIявусса хIадисру бур,
Миннал санадру буслан бюхъай кIану ва бакъар.
Алжаннул хьулу буссар ЗухIа тIисса цIа дусса,
ЗухIалий даим хьума му хьулувх уххан айссар.
Къагьарив вин ва давлат, хIадурсса ва сааьдат,
Ниттил ув кьини куна бунагьрая марцI шайссар.
(гихунмайгу буссар)
