Лакрал миллатрал мажлис

Лакрал миллатрал мажлис

Декабрьданул 13-нний МахIачкъалалив вокзалданул чIаравсса мизитраву хьунни хъунмасса диндалул мажлис. Ва кьини шиккун бавтIун бия лакрал жямат: хъами-душру цалчинмур зивулий, арамтал кIилчинмуний. Сайки щалва мизит бувцIуну бия.

Мажлис бачин бувну ия Лакрал райондалул имам МухIаммад Майранов. Ванал кIицI лавгуна инсаннан Аллагьнал ﷻ  буллусса яла хъунмур неъмат – бусурманну ляхъан аву хъанахъишиву: «Аллагьнал ﷻ  увкуну бур: "Зуща къахьунтIиссар На зунма буллусса циняв неъматру буккин, аьдад-ккал дан". ЧIявуну жунма хъамабитай Заннайн щукру буллан» – увкуна ванал. Имамнал дакIнин бувтуна мажлис сакин баврил ца агьаммур мурад – Палестиннавусса бусурманнаха дуаь дан цачIун шаву бушиву.

Мажлисрал дайдихьу дуруна щалва Кьуръан дакIних лавхьхьусса хIафиз, Ххутиял шяраватусса МухIаммаднаби Буттаевлул исвагьисса чIуний цаппара аятру буккаврийну.

Лакрал жамятрал хьхьичI махъ лахъан увкIсса Муфтийнал кумагчи Идрис Асадуллаев цалва вяъзалуву халкь байщун буллай ия ялун-ялун гуж хъанахъисса питнардая, дюъ дирхьуна гайннуя мурахасну бикIан аьркинссар куну. «Мукунсса питнарду хъанахъисса чIумал буван аьркинмур баян бувну бур имам Бухарил луттиравусса хIадисраву. Идавсил ﷺ увкуну бур: "Имам усса жяматрал ххуллу бугьияра". Цамур хIадисраву куну бур: "Ттул уммат бяйкьусса ххуллий цачIун къахьунтIиссар". Мунияту жунма аьркин бакъассар мичча-тичча буклакисса блогертурах, вана-танах вичIи дихьлан. Имамтурал хъирив бачавривур дусса жула ххассалшиву», – бувчIин бувуна аьлимчунал.

Новостройрал имам Хаваев Мансурдул дакIнин бувтуна гьарца бусурмансса инсаннал бурж хъанахъишиву Ислам хьхьичIуннай дачин давриву гьуртту шаву: «Кьуръандалуву бувсун бур жува бушиву халкь оьмуния байщун бувну, хъинмунийн тIайла бацIан бувайсса уммат. Мунияту, насихIат баву – му так имамнал бурж бакъарча, гьарца инсаннал цащава шайкун дуллан аьркинсса даву хъанахъиссар», – увкуна имамнал.

МахIачкъалалул имамтурал хъунама Аьбдуллагь Ахаловлул дакIнин бувтуна муданмагу лакрал миллат гьарца ишираву хьхьичIунсса кIанттурду бувгьуну най бивкIшиву. Хъирив ванал лахьхьин бувуна диндалийн бувну дусшиву дувансса инсан язи угьан аьркинсса куц: «Дусшиву даврил дуссар ххюра шартI: дусну увчIин аьркинссар аькьилсса, хъинсса хасият дусса, хъуни бунагьру къабайсса, дакI ва чурх так дунияллул хъус-маэшат бавриха зузи къадурсса, щялмахъ къабусайсса инсан».

Ккуллал райондалул имам МухIаммадманнар Бариевлул вяъза хас бувну бия цачIуншиврул, уссушиврул агьамшиврул агьамшиврун: "Кьуръандалуву баян бувну бур циняв бусурмансса инсантал уссурвал бушиву. Ялагу Аллагьнал ﷻ  буюр бувну бур, зу цинявппа Аллагьнал ﷻ  диндалул лагма цачIун хьияра, куну. Мунил бакъа жува цачIун къабантIиссару».

Мажлисрал ахирданий кIунтти бувккун Оьмра (чIивимур ХIаж) бансса путевка пишкаш дуруна.

Мунияр махъ циняв бусурманнахасса дуаьгу дурну, мажлис къуртал хьуна.