Лакку мазрал диктант – 2025
Октябрь зурул 18-нний МахIачкъалаливсса тарихийсса паркраву хьунни лакрал миллатран ва лакку мазран агьамшиву лахъсса мажлис – шикку хьунни «Лакку мазрал диктант». Ваниву гьуттушин дурунни 400 инсаннал. Ва хьунни ниттил маз ябаврий дакI цIуцIисса инсантурал сипталийну ва хIарачатрайну дуллалисса мероприятие.
Мажлис бачин бувну ия Дагъусттаннал чичултрал лакралмур секциялул каялувчи Супиян Оьмаров. Диктант чичлай байбишиннин залданувун цачIун хьуминнал хьхьичI махъру лавхъунни республикалул жяматийсса палаталул бакIчинал хъиривчу Сапарбейг Аьбдуллаевлул, тарихрал элмурдал доктор АхIмад Кьурбановлул, хIукуматрал иширттал зузала Артур Амутиновлул, МВД-лул полковник Энгельс ХIажимахIаммадовлул, Дагъусттаннал бакIчиначIасса хъунилсриннал советрал бакIчинал хъиривчу Шалласу Шалласуевлул, МахIачкъалаливсса Сайфуллагь-Кьади Башларовлул цIанийсса мизитрал имам МухIаммад Саламовлул.
Циняв махъру лавхъминнал чIурчIав дуруна маз буруччаврил агьамшиврий. Имамнал насихIат хас бувну бия дин, маз ябаврин ва миллатрал цашиврун: «Жула миллатрал дин кьамул дурну 1300-хъул шинну хьуну дур. Ваксса мутталий аьраб маз ишлану бивкIхьурчагу, цаягу лаккучу къавхьуссар лакку маз хъама бивтсса. Мува куццуй, хIакьину оьрус маз ишлану бушиву жула маз хъамабитансса сававну ккалли буван къааьркинссар. Гъира бухьурча, оьрчIангу, оьрчIал оьрчIангу мазгу, дингу, тарихгу лахьхьин бан шайссар. Аллагьнал ﷻ кабакьиннав!», – увкуна МухIаммад-хIажинал.
БавтIминнан тамашалун ккаккан дуруна личIи-личIисса хIукуматирттай ялапар хъанахъисса лакрал видеолийнусса оьвчавуртту.
Диктант чичин язи дургьуну дия чичу-фронтовик Абакар Мудуновлул чичру. Текст бувккуна лакку маз лахьхьаврил центрданул каялувчи ПатIимат Аьлиевал.
