Шанма хIакь
Идавсил ﷺ хьхьичIунсса асхIабтал Салман аль-Фариси ва Абу Ад-Дарда цIакьсса дустал бивкIун бур. Гайннал дянив дусшиву, уссушиву дацIан дурну диркIссар МухIаммад Идавсил ﷺ.
Ца кьини Салман увкIун ур Абу Ад-ДардачIан хъамалу. Ганан хIисав хьуну бур хъинну мискинсса къуш ва цихара къулагъас къадуллалисса щарсса. ЦIувххуну бур мукунсса иширал сававрая. Щарссанил бувсун бур цила лас дяхтта мудан зума дургьуну, хьхьувай чакру, эбадатру дуллай, къатлух багьайкун уруглай акъашиву. Абу Дарда шавай увкIукун, Салманнул ганахь цащала дукра дукан ити, хъамалушин дува увкуну бур. Абу Дардал бувсун бур ссуннатсса зума дургьуну ушиву, амма Салман цаламуний авцIуну ур. Абу Дардан багьну бур зумагу ита дакьруну, хъамаличунащал дукра дукан. ЦIан лакьайхту, Абу Дарда чакру буллай айишин ччай ивкIун ур, амма Салманнул къаивтун ур, чансса хIаллай шану лахъан утту ихьу увкуну бур. Игьалагангу ивтун, цаппара хIаллава Салманнул Абу Дарда чак буван чантI учин увну ур. КIюрххил ганачIату ачлачисса чIумал Салманнул увкуну бур: «Щак бакъа, вил буссар Занналгу, чурххалгу, кулпатралгу хьхьичIсса хIакьру. Гьарцаманал цала хIакь щаллу булува».
Ва иширая Идавсихь ﷺ бусайхту ганал увкуссар: «Салманнул тIайласса махъру увкуну бур».
