АсхIабнал чувшиву
АсхIабнал чувшиву
Оьмар ибн Аль-ХатIтIаб халифну усса чIумал укунсса иш хьуну бур. Оьмар-асхIабнан мизитраву ххал хьуну бур кIия жагьилнал ца адимина увгьуну, цащала увцуну най. Оьмардул цIувххуну бур миннахь: «Зу ци дуллалиссару?» – куну. «Я муъминтурал хъунама. Ва адиминал жул ппу ивкIунни!» – жаваб дуллуну дур миннал. «Му тIайлассарив, ина ивчIав миннал бутта?» – цIувххуну бур Оьмардул адиминахь. Адиминал бувсуну бур Оьмардухь хьумур: «Ттул варани лухччиний канай бунува миннал буттал аьрщарайн бувххуна. Мунан цала аьрщарай цаманал варани ккавккукун ттул варанттуйх чару бивщуна. Му чару варанттул иттав щуна. Ттун сси бивзуну нагу мунайх чару бивщуссия. Муния дирсса щавулул му ивкIуна». Оьмардул цIувххуну бур жагьилтурахь: «Зу ци бан ччай буру?» «Жу бивкIулух кьисас ласун, ва адимина ивчIан ччай буру!», – увкуну бур жагьилтуралгу. «Хъинни», – увкуну бур Оьмардул . «Я муъминтурал хъунама, миннатри, цахъис чIун дула ттухьхьун.
Ттул чIивима уссу уссар. Уттигъанну жун чIярусса хъус кьариртуну жул ппу ивкIунни. Мий дусса кIану ттун бакъа къакIулссар», – миннат буллан ивкIун ур адимина. «Туну ина ци дуван ччай ура?» – цIувххуну бур Оьмардул . Шавай лавгун, уссийхьхьун мий хъусгу дуллуну кIура аян», – увкуну бур адиминал. Мунал ялагу увкуну бур хъяврин къабантIишиву. Оьмардул цIувххуну бур мунахь: «Урив цукIуй ина зана къахьурча вихлу жуав дулунсса?» Адиминал бувсун бур акъашиву. Оьмардул увкуну бур цахлура жуав дулунсса инсан къалявхъссаксса ита акьин къахьунссар куну. Ва щалва иш хъанай бивкIун бур мизитраву. Мизитгу бивкIун бур халкьуннал бувцIуну. Адимина лагма-ялттугу урувгуну цIувххуну бур: «Урув жул дянив ттухлу жуав дулунсса инсан?» ЩилкIуй жаваб къадуллуну дур. Оьмардул ялагу увкуну бур: «Агана вин вихлура жаваб дулунсса инсан къалякъирча ттуща ина ита акьин къабюхъанссар». Му адиминал ялагу увкуну бур циняв бавтIминнахь: «Урув зул дянив ттухлу жуав дулун хьунсса инсан. Лажиннича бусурманчунан кумаг аьркинсса чIумал мунан кумаг бувансса инсан къахьунтIиссарив?» Цакуну халкьуннал дянива ца инсаннал ка гьаз дурну дур. Му ивкIун ур Абу-Зар асхIаб .
Оьмардул цIувххуну бур мунахь: «Абу-Зар, инава ци дуллалиссарав кIуллив вин? Ва зана къахьурча ванахлу инава ивчIантIишиву кIуллив вин?» «Ттун кIулли нара дуллалимур», – увкуну бур Абу-Зардул. Оьмардул ита авкьуну ур адимина шавай. Гьантта лавгун бур, кIива, шамилчинмур кьини ахттакьун чаклил чIун дуркIуну дур. Адимина ттигу зана къавхьуну ур. ИвкIусса адиминал арсру бувкIуну Абу-Зардул къатлувун увкуну бур мунахь: «Жу вихь бакъаяв ганан кумаг мабувара тIий. Га ттигу къаувкIунни. ЧIал къавхьуну вил бакI хъачIунттая дагьантIиссар». «МаркIачIан чаклил чIун дучIан дурархха ттигу», – увкуну Абу-Зар шавату увккуну мизитравун лавгун ур. Щалва шагьру бивкIун бур Идавсил e асхIабная гъалгъа тIий, хIакьину мунал бакI кьукьинссар, цува хъинну авадансса унугу цичIав баххана буван бюхълай акъар тIий. ДуркIуну дур маркIачIан чаклил чIун. Цакуну мизитравун увххуну ур га ита авкьусса адимина. Оьмардул махIатталгу хьуну цIувххуну бур ганахь; «Ина циван зана ивкIра, нания вил хъирив цучIав гьан къаував. Вищания къаучIангу бюхълай бия». «Я муъминтурал хъунама. Ттун ччай бакъар халкьуннал увкуну, бусурманнал махъгу буллуну бацIан къабай». Яла Оьмардул цIувххуну бур Абу-Зардухь : «Ина циван рязий хьуссияв вина къакIулсса инсаннахлу жуав дулун?» «Я муъминтурал хъунама. Ттун ччай бакъая халкьуннал бусурманчунан кумаг аьркин хьусса чIумал щилчIав кумаг къабувунни увкуну». Оьмар урувгун ур кIиягу жагьилнах. Миннал увкуну бур: «Я муъминтурал хъунама. Жул буржри вай багъишла битан».
ХIАМЗАТ МАХIАММАДОВ
