Къаларду

Къаларду

Цува ивчIан чIун диллай душиву мяйжан хьусса ца авадансса адиминал цала арснайн аманат бувну бур:

– Арс, вила тIавкьат гуж хьуншиврул, ина вай жула лагмарагусса шяраваллаву винма къаларду бува. Агана инава захIматравун агьларчан, пулансса шяраватусса пулансса дусначIан насу, куну, ганал цIа-бакIгу бувсун бур.

Накьлу хьуну ур ппу.

Ххирасса буттал аманат барт бигьлай, улувкьуну ур арс шяраваллал бакIрах къалардува къаларду буллай.

Мукун зий, бухлавгун бур буттал кьабивтсса ххазина. Хьуну ур мискин. Буржирай муна-танахь дула тIисса кIанайн агьну ур.

Вана укун къуманивун агьсса чIумал дакIнин багьну бур буттал цайнма бувсса кIилчинмур аманат: «Инава захIматравун агьарчан, пулансса шяравусса ттул дусначIан насу», – тIисса.

Лавгун ур га цала буттал дусначIан. Бувсун бур ганахь цала хIалкьазия, цайнна дурксса къини. Буттал дуснал ганахь куну бур:

– Вила буттал вийнма бувсса аманатрал мяъна вин дурчIуну диркIун дакъар. Гьарицагу шяраву винма къаларду бува увкусса аманатрал мяъна: винма щархъал бакIрах хъинсса хъамаличу, дус увая увкусса.

Вин бувчIуну бивкIун бакъар буттал аманат чарттал къаларду бавриясса къабивкIшиву.

Бан-битан бакъа, кьарчI ивкIун ливчIсса цала дуснал арснахь ялагу куну бур: Ласи ттучIату вай арцу. Зузу, заназу. Буттал тIикунсса къаларду мудан буллалу.