Террорчулукъгъа къаршы дав – шайтангъа къаршы дав
Террорчулукъгъа къаршы дав – шайтангъа къаршы дав
Террорчулукъ инсан урлукъну алдан берлиги «ёлдашы». Инсанны лап биринчи ва аслу террорчусу – Иблис. Ол биринчи инсанны – Адам пайхаммарны – гёргендокъ, ону гюллеме башлады, оьктемлик гёрсетди ва душманы болду. Натижада Иблис Яратгъаныбызгъа тынглавсуз болуп, адам урлукъну душманына айланды. Бу къаршы турув тап Къыяматгюн болгъанча узатылажакъ.
Иблисни аслу негети – инсангъа оьчлю болмакъ. Ол ялгъан ойлагъа къуллукъ этдирмеге, гьакъны мысгъыллама къарай, адашдыртып адамланы тюз ёлдан тайышдырма гьаракат эте, шайтанланы сыдраларын артдырма белсенген. Экстремизм, фашизм, расизм, миллетчилик ва шо меселдеги оьзге пасат ёллар – шайтан гьаракатлар. Террорчулукъ буса, шо терс муратлагъа гелмек учун къолланагъан гючлю ва инг яман къурал.
Террорчулар – шайтанны къуллукъчулары. Булар халкъны къоркъутма сюе, гёз алгъа тутгъан муратлары учун, биревню де къызгъанмай, гиччини-уллуну къырмагъа гьазир. Жинаятчы иши авур болгъан сайын, муратларына тез етишербиз деп ойлашадыр.
Амма бу дав нечик битежеги алданокъ белгили: Иблис ва ону асгери дагъытылажакъ, оланы ери – Есибизни адиллиги булан гёрсетилген жагьаннем болажакъ.
Шайтанны васваларына къаршы туруп, гьакъ ёлдан тайышмай, иманын саклап, герти дюньягъа гёчгенлер – Есибизни адиллигине гёре женнет бавлагъа тюшежек.
Гьалиги дюньяны къоркъунчлукълары
«Террочулукъ», «террорчулар», «террорчулукъ гьаракат» – бу сёзлер гьар гюн маълумат къуралларда чалына ва адамланы къайгъылы эте, гележегибиз нечик боларгъа ойлашдырта.
Гьалиги зулмучулар техника якъдан гючлю ясалгъан, не яманлыкъ да этмеге имканлыгъы бар. Олар учун харжланагъан маялар да ажайып кёп.
Шолагъа къаршы турувунда гьукумат идаралар, жамият бирлешивлер ва ругьанилер биригип иш гёре, зулмуну алдын алма гьаракат эте.
Дин экстремизмге ва террорчулукъгъа къаршы идеология якъдан бир-бир чаралар гёрюле. Шону учун адатланып гелген дин билим оьсдюрюле. Олай да, оьсюп гелеген наслуну патриот ва ругь-къылыкъ якъдан тарбиялавгъа агьамият бериле. Адамланы ихтиярлары къыйыкъсытылмас учун, герек чакъы иш этиле. Бусурманлар оьзге динни юрютегенлер булан байлавлукъда иш гёре, миллетчиликни алдын ала, дин уьстде эришив болмасны гьайын эте. Нечик алай да, бу ишлер террорчулукъну ва экстремизмни ёкъ этмек учун юрюле.
Жамиятны парахатлыгъы учун бирликде гьаракат этилегеде яшавубузну аман сакъламагъа шайлы къолай болажагъы ачыкъ.
Терроргъа къаршы тургъанланы гюню
Бизин уьлкебизге террор кёп зарал этген, айрокъда арт девюрде. Шо себепден Россияда терроргъа къаршы тургъанланы гюню белгилене. Бу тарх 3-нчю сентябрде белгиленегени де тамаша тюгюл.
20 йыл алда Бесланда лап авур террор иш болду, ону натижасында 334 адам, оланы арасында 185 яш оьлдю. Школаны елеп алгъан вагьшилер бир гюнагьы ёкъ, асил жанлы яшланы есирге алып, инсан этмесдей зор жинаятчылыкъ этди. Темиркъазыкъ Осетияда да, ватаныбызны оьзге ерлеринде де бу болгъан иш бары да адамланы титиретди, оюна сыйышдырып болмасдай гьал тувдурду. Налатлы ва гечилмес бу иш эсибизден таймас.
Белгиленеген тарх – бир айыпсыз къырылгъан яшланы, оланы ювукъ адамларыны агьын эсде сакълавчусу. О гьакъда бирт де унутма ярамас.
Бесланда болгъан вагьшилик янгыз Россияда тюгюл, миллионлар булангъы сав дюньяны халкъын да къайгъылы-дертли этди. Террорну къурбанлары унутулмас учун, экстремизм, миллетчилик ва оьзге бары да ялгъан ва агъулу агъымлар ёкъ этилме герекни гьакъында биз жамиятны эсине даим салма тарыкъбыз.
Террорчулукъ якълавчуларын тапмагъа болмас учун да, жамият гьаракат сёзюн де, ишин де болдурмагъа тарыкъ, жинаятчыланы умутларын тамурундан сёндюрме герекбиз. Бизин ватандашларыбыз бу имансызланы вагьши ёлда этилген ишлерин яхшы биле. Уьлкебиз оланы къолу булан этилген хыйлы балагьланы башдан гечирген – уьйлер дагъытылгъан, метро, самолёт, поездлер атылтылгъан, азарханаланы, театрланы къолгъа алып, хыйлы есирни, бир айыбы да ёкъ адамланы оьлтюрген. Савутлангъанлар булан бетге-бет турма болмай, шолай нече-нече осал иш этгенлер.
2024-нчю йылда бизин уьлкеде де, къалгъан дюньяда да этилеген террор ишлер аз тюгюл. Гьар гюн гюнагьсыз халкъ къырыла.
Террорчулукъ – гьалиги яшавну лап оьжетли душманы. Парахат дюньяны гьалек этеген гючлеге халкъара жамият биригип къаршылыкъ билдирмесе, ондан утма бажарылмас. Амма огъар дав этгенче, алдын алмакъ дагъы да таъсирли болар. Бирикген жамият не душманны да дагъытма ва ёкъ этме бола. Уьйлерибиздеги, шагьарларыбыздагъы ва юртларыбыздагъы рагьат яшавубуз гьарибизден гьасил. Ортакъ масъалалагъа немкъорай янашмасакъ, гьалыбыз эниш гетмес. Ювукъ адамларыбызны гьайын этип, бирикмеге тарыкъбыз, жаваплыкъны оьзюбюзге алма къоркъмай, гьаракат этмеге герекбиз.
Бизден болагъанны биз этсек, террорну ийисин билгендокъ къаршы чаралар гёрмеге болсакъ, тийишли къурумлар булан къол ялгъап ишлесек, парахат яшав сакъланаргъа умут артар.
