Москвада оьтгерилген ифтар
Рамазан айны узагъында бусурманлар ораза тута, ораза ача.
Бир-бирде жыйылып, мажлислер оьтгерип де оразасын ача. Ифтар деп айтылагъан шолай жыйынлар хыйлы адамны къуршай, бирикдире. Динибиз гёрсетеген кюйде, дин къардашлыкъ аралыкълар беклеше. Булай мажлислени агьамиятлыгъы къурбатда айрокъда арта, тувгъан еринден арекде яшайгъанлар миллет къардашлары булан ёлукъма, къатнама бек сюе. Ораза айны ичинде Москвадагъы къумукълар гьазирлеп, ватаныбызны тахшагьарында оьтгерген шолай жыйын хыйлы бизин якълы адамланы жыйды.
Мажлисде ортакъчылыкъ этмек учун, Магьачкъаладан иш этип гелген абурлу алимибиз Магьамматханафи-гьажи Гьамзатов жыйылгъанлагъа ана тилибизде насигьат охуду, адамланы юреклерине ёл тапды. Олай да, мажлисде назмулар, мавлетлер охулду. Ифтарны онгаргъан адамлар къардашлыкъ татывлукъну гьислерин, бир-биревге бакъгъан абурну ва сюювню сезмек деген мурадына етишди, деп толу кюйде айтма ярай. Гертиден де, агьлюлери булан гелген къумукълар шо гюн оьзлени Дагъыстанда йимик гьис эте, ана тилинде чалынагъан лакъыр, къатнав адамланы шат этди, гёнгюн алды. Ёлугъув булан рази къалгъан халкъ, бу мажлислени оьтгергенлеге кёп алгъышлар айтды, баракалласын билдирди.
Йыракъ эллерде яшайгъанда ана топуракъ айрыча къыйматлана, ана тилдеги сёз жан сююндюре, миллетингни адамлары аявлу къардашынгдай гёрюне. Мажлис этгенлер шо гюн уллу зувап къазангъандыр деп эсибизге геле, неге десе бир якъдан адамлар пайдалы насигьатлагъа тынглады, башгъа якъдан буса, инсан аралыкълар беклешивге арив иш этилди. Къайда болса да, ватанындан арекде яшаса, бары да бусурманлар Аллагьгъа ﷻ аманат болсун, элин унутмасын, ана тилин ва маданиятын сакъласын.
