Къуймакъны бир журасы
Къуймакъны бир журасы
Брокколи – тиштайтапаны савлугъу учун инг пайдалы овошлардан санала, неге тюгюл ону ичиндеги пайдалы затлар хыйлы аврувланы алдын ала.
Ондан къайры, брокколиде тиштайтапаны къаркъарасына тарыкълы клетчатка, белок, фолиевый кислота, А ва С витаминлер, темир ва калий бар. Амма, шогъар да къарамайлы, бу емиш аз къолланагъаны тамаша тие. Уьстевюне, бу овошну кюю булан биширсе, ондан бек татувлу аш бола. Бугюн брокколи булан къуймакъ этеген кюйню айтайыкъ, пайдасы дагъы да кёп болсун учун, ону печни ичинде биширебиз.
Тарыкълылары: брокколи – 250 грам, сют – 150 миллилитр, йымырткъа – 2 таман, кама – 10 грам, туз ва специялар – гьар ким сюеген кюйде (къошмай къойма да ярай).
Брокколини туврап, гесебиз (бузлангъан гьазирлерин ала бусагъыз – о да къыйыша) ва тузлангъан сувну ичинде беш минут биширип, сувун ташлайбыз. Сонг къазанны яда ялгъавну ичине кама сюртюп, ичине бишген брокколини салабыз. Йымырткъаны сют булан аталап булгъайбыз, сюегенлер – туз да, специялар да къоша ва, булгъанып битгенде, муну брокколини уьстюне тёгебиз. Шолай этилген сонг, 180 градусгъа ерли къызгъан печни ичине салып, ярым сагьат биширебиз.
Ашыгъыз татувлу болсун!
