Янгы шиърулар

Ана тилин сюеген, къумукъ тилде шиъру язагъан оьсюп гелеген пагьмуну яратывчулугъу булан бугюн охувчуланы таныш этмеге сюебиз. Зульфия Расулова Акаева 1966-нчы йыл Бабаюртда Апаевлени агьлюсюнде тувгъан. Гиччиден берли шиъру яза. Мактапда 36 йыл ишлей, буссагьатгъы вакътиде Хасавюрт шагьардагъы 8 номерли орта школада ана тилден ва адабиятдан дарс бере.

 Заман

Бу йылланы гетегени!

Гюню гюнге ошамай.

Эртен турсанг, дандирекдей,

Ахшам бола къарамай.

Сувдай агъа заман, гьейлер!

Йыллар йылгъа ошамай.

Яшав гетип, адамлар да,

Узакъ оьмюр яшамай.

Язбаш гетип, яйы геле,

Ону арты булан гюз.

Гюзден сонг сувугъу булан,

Къагьруманлы геле къыш.

Заманлары табиатны,

Алышына чар йимик,

Тутуп болмай адам ону,

Яшаву гете сув йимик.

Яхшылыкъдан-яманлыкъгъа,

Яманлыкъдан-яхшылыкъ.

Бирче юрюй, ари таймай,

Адам юрек таш йимик.

Вай мени азиз Аллагьым ﷻ,

Яшав берген уьмметге.

Сакъла бизин, якъла бизин,

Биз алдынга гелгинче.

Савлукъ болсун бу дюньяда,

Яратылгъан инсангъа,

Сююнч берсин, къуват берсин,

Гьар тувгъан бусурмангъа.

Намус

Бир уьйде гиччи яш авруй.

Йылай ана, халкъдан кёмек излей.

Тилей Аллагьгъа ﷻ, тилей докъдургъа,

Ёкъму дей кёмек, оьз баласына.

Гётерген къоллары кёклеге етише,

Эки къол – эки терек, арымакъны билмей.

Тек, халкъ пысгъан, сирешген бары.

Агьын эшитмей, къолланы гёрмей.

Бу дюнья дёгерек, Аллагь ﷻ сакъласын

Гелмесин дёгереп, о гюнлер бизге.

Тюшмесин агь чегип, гёзьяшны тёгюп.

Къолланы гётерме, тилекге кёкге.

Ким гелир шо заман бизге кёмекге?

Ким эшитер бизин, юрек агьыбыз?

Кимге тарыкъ бизге кёмегин этме?

Биз бугюн кёмегибиз этмесек тарыкъгъа!

Гёрме сюймей бусакъ, хоншуну къыйынын,

Эшитме сюймей бусакъ, языкъны агьын,

О гюнлер йыракъ, бизге болмас деп.

Турабыз яшавну гюнден-гюн яшап.

Гёрсете Аллагьым ﷻ бизге яшавну.

Англата кёп затны болагъан кюйде.

Тек адамны бюгюн намусу битген.

Сатылгъан байлыкъгъа ва намуссузлукъгъа.

Гелигиз, жыйылып яшав башлайыкъ,

Бир-биревге иржайып кюлеп къарайыкъ,

Хоншудагъы къартны абурлап сыйлайыкъ,

Тангалагъы гюнюбюзню-бюгюн ойлайыкъ.

Эшитейик юрекни къайгъыдан толгъан,

Гёрейик къолланы кёклеге бакъгъан.

Юреги къайгъысыз халкълагъа ошайыкъ.

Дюньябызда парахатлыкъны бугюн сакълайыкъ.