Мустай Каримни китабы къумукъ тилде чыкъды
Мустай Каримни китабы къумукъ тилде чыкъды
Башкъырт адабиятны классиги Мустай Каримни атын сав дюньяда таный, бизин якъларда да ону асарларына гьюрмет эте, охуй. Гьалиден тутуп буса, башкъырт тилде язылгъан шиъруланы къумукъ тилде де охумагъа бажарыла. Анадаш халкъны тили бизге ювукъ ва англавлу, шо саялы тамаша тюгюл къумукълар да ана тилинде Мустай Каримни яратывчулугъун охуп болажагъы. Мунда шаирибиз Багьавутдин Самадовгъа баракалла сёз айтмагъа тийишли болур.
Ону гьаракаты булан, йыракъдагъы тюрк миллетли къардашлар къумукълагъа дагъыдан ювукъ болду. Мустай Каримни «Гёнгюм – йырда…» деген китабын энни Б.Самадовну яхшылыгъындан ана тилибизде охумагъа бола. Шаирни пагьмусу ва авторну гьар сёзюн аявлап болагъаны охувчугъа тизив савгъат болду. Терен маъналы шиърулар ойлашагъан адамны титиретмей болмас, эсинде къалар ва ругь якъдан байыкъдырар.
Багьавутдин Самадов биринчилей тюгюл къумукъ халкъны адабият хазнасын артдырагъаны, чебер сёзю ва итти каламы булан охувчуну сююндюрегени. Биз огъар гележекде де илгьамын тас этмей, пагьмусун къызгъанмай миллетине гьалал къуллукъ этмеге ёрайбыз. Бизин яныбыздан буса, пагьмулу шаирибизни китапларын охусакъ, шиъруларын гёнгюнден билсек, огъар лап уллу савгъат болур деп эсибизге геле.
