Расул Гьамзатовну эсделигине
Расул Гьамзатовну эсделигине
Белгили авар шаирни яратывчулукъ ёлуна тергевню бакъдырмакъ, шаирни асарларыны чеберлик аламатын гёрсетмек, охувчуланы ахтарывчулукъ ишлер юрютмеге бажарывлугъун теренлешдирмек, муаллимлени аслу мурады.
Расул Гьамзатовну Дагъыстанны къысматында ёлун, бютюн дюнья учун гёрмекли агьамиятын ачыкъ этип, шаирни асарларыны тарбиялав мердешлерин аян этмек де муаллимлени мурады. Гьар миллет оьз язывчуларын ва шаирлерин яшлагъа айта турса, тарбиялав ва намуслукъ артар, яшавну яхшысын-яманын билер.
Унутулмас сатырлану устасы
Гетди шаир, дагъы къайтмас ёлуна,
Оьрге чююп оьз халкъын ва миллетин.
Аты къалды накъышланып ташларда,
Мажлислер къурулду тав башларда.
Дав майданда тува буса игитлер,
Сёзюнг булан къалдынг игит сыдрада.
Язгъан сени гьар сатырынг, гьар шиърунг
Эсделикге къалажакъ халкъ арада.
Авар халкъны оьрге чюйген уланы,
Дагъыстанны салгъан оьр канзилеге.
Бу йыл сени абурлап сав бусурман халкъ,
«100-йыллыгъы Расулну», – деп сыйлагъан.
Унутулмиас сени шиърунг «Турналар»
Дав йыллардан бу йыллагъа етгинче.
Нече миллет сав дюньяны уьстюнде,
Охуй ону гёзден гёзьяш акъдырып.
Эсделик
(Уллу Ватан давда ортакъчылыкъ
этген уллатабызны эсделигине)
Бир гюн эртен алдым къолгъа альбомну,
Давдан къалгъан уллатамны яшлыгъы.
Танымайлы, адашып къарап къалдым,
Нечик беш йыл алышдыргъан адамны.
Беш йыл нечик алышдыргъан, вай гьейлер,
Айтса битмес ону аччы хабары.
Тек къысгъартып айта ону барын да,
Уллатама давда тийген ярасы.
Текеран бир адашып да сорасанг,
Дав йылларда гёрген къыйын гюнлени.
Бир сёзю бар, жавап этип айтагъан,
«Оьлюм, балам, топлар булан гелеген.
Агьы, балам, мендей эркек эрлени,
Жанын берген, абат артгъа алман деп.
Къарап алгъа абат алгъан къоркъмайлы,
Яш юреклер, тартынмайлы оьлюмден».
Уллатам ёгъу мени кёп бола,
Яралары язылгъандыр жабарда.
Тек таймажакъ ер юзюнде билемен,
Мени жаным, бу дюньяда сав чакъы.
