Къуръанны гёнгюнден охув ярыш
Къуръанны гёнгюнден охув ярыш
Белгили кюйде, 2021-нчи йылны Рамазан айыны ахыр гюнлеринде Уллубийавулда (бырынгъы Уллубойнакъда), Дагъыстанны ичинде биринчи болуп, 4 минаралы тюрк къайдада гёзел ва берекетли жума межит къурулап битди ва юртну халкъына шону ачылыву болду. Шо заман коронавирус аврув себепли болуп, межитни ачылывуна хоншу юртлардан, шагьарлардан, республикадан тыш ерлерден абурлу къонакълар чакъырылмагъан эди.
Шоллукъда, август айны 20-нда Уллубийавулдагъы янгы жума межитни ачылывуна багъышланып берекетли мажлис оьтгерилди. Шо чарада юртну жамияты булан бирче сыйлы оьзгелер де ортакъчылкъ этдилер. Ачыкълашдырып айтсакъ, Къуръанны гёнгюнден охуйгъан яшёрюмлени арасында шо гюн районара ярыш оьтгерилди. Шо ярышны пагьмулу яшёрюмлени якълайгъан Солтанмут Тарковскийни атындагъы фонд оьзюню бойнуна оьтгермеге алгъан эди.
Шо ярышда Дагъыстанны бары да къумукъ районланы вакиллери булан янаша хоншу Мычыгъыш республикадан гелген яшлар ва оланы муаллимлери де бар эди.
Эртен намаздан сонг гёзел жума межитни абзарында уллу жанланыв ва юртлулар онгарылмагъа башлады. Айтагъаным, майданчаны къапусуну, межитни эшиклерини уьстюне къонакълагъа лайыкълы сёзлер, оланы юртлулар иржайыв ва исси юзлер булан къаршыладылар.
Шо гюн сагьат 9-да башлангъан ярыш экинни намазгъа тамамланды. Ярышны шартларына гёре, 5 тюрлю номинацияда ярышлар юрюлдю. Шоланы арасында сыйлы Къуръанны таза ва тийишли кюйде охув, олай да, 1, 3 ва 15 жузланы гёнгюнден охув номинациялар бар эди.
Ярышны ортакъчыларыны пагьмусун ва бажарывлулугъун къыйматламакъ учун белгили ва гьюрметли алимлерден жюри къурулгъан эди. Ярышларда ортакъчылыкъ этген 114 яшёрюмню 60-ы – уланъяшлар ва 54-сю къызьяшлар эди. Демек, уланлар булан янаша къызлар да оьзлени пагьмусун ва сыйлы Къуръанны гёнгюнден билегенин аян этдилер.
7 сагьатны боюнда межитде сыйлы каламлар охулуп турду, шолар къаравчуланы юреклерине балгьам йимик болду деп айтмагъа ярай. Халкъ шо ишге бек рази болду деп айтмагъа тийишли.
Озокъда, межитни ачылывуна багъышлангъан чарагъа ва ярышны барышына къарамагъа Дагъыстанда атлары белгили ва насигьатлары пайдалы дин ругьанилер чакъырылгъан эди.
Шолардан бир-экисини атларын эсгерейим: Дагъыстан муфтини кёмекчиси Ильяс-гьажи Умалатов, Телей-гьажи Къазыханов, дейбукълу Абдулла-гьажи, устаз Магьамматрасул-гьажи Хасаев, Магьамматгьанапи-гьажи Гьамзатов, Абдулла-гьажи Гьажимоллаев, Магьамматбургьан-гьажи Бабатов, Камилсолтан-гьажи Вагьапов, Халит-гьажи Бабатов ва айлана якъдагъы юртланы имамлары.
Межитни ачылывуна багъышлангъан берекетли чарада оьрде атлары эсгерилген алимлерибиз оьзлени насигьатлары булан сёйледи. Олар оьз сёйлевлеринде бусурман адам даим Аллагьгъа мудиъ болмагъа, намазларын болгъан чакъы межитде къылмагъа гереклигин ачыкълашдыргъан сонг, инсанлар бир-бирине рагьмулу ва йымышакъ болмагъа, яхшы ишлер учун къуршалмагъа тарыкълыгъын да ташдырып айтды.
Ярышны ортакъчыларына – сертификатлар, алдынлы ерлени алгъанлагъа – грамоталар ва акъча савгъатлар, муаллимлерине буса баракалла кагъызлар тапшурулду.
Пагьмулу яшёрюмлени якълайгъан Солтанмут Тарковскийни атындагъы фондну ёлбашчысы Надирсолтан-гьажи Абдурагьманов гелген гьюрметли къонакълагъа, ярышны ортакъчыларына ва, озокъда, ата юртуну жамиятыны атына баракалла сёзлерин айтды. Айрокъда, харж ва садагъа булан кёмеклешген уллубийавуллулагъа лайыкълы сёзлер айтылды. Шо сёзлени арасында тюрк къайдада 4 минаралы жума межитни къурмагъа бойнунуа алгъан Абдурагьман-гьажи Абдурагьмановгъа да разилик билдирилди.
