«Рамазан айны чатыры» Къызылюртда оьтгерилди
Гьар йыл дегенлей, уьстюбюздеги йылда бир керен гелеген рамазан айны сыйлап, гьар ким яшавубузда бир яхшы амал этмекни гьайында болабыз.
Рамазан айны оразасын тутмакъны зувабы уллу йимик, ону ачмакъ учун сурсат берген адамгъа да шолай зувабы тиегени юрекге сабурлукъ бере.
Артдагъы вакътиде ер-ерде оразасын ачмакъ учун «Рамазан айны чатыры» деген ахшамны гьаракаты арта барагъанын гьис этебиз. Дейгеним, Къызылюрт шагьарда да шолай ахшам оьтгерилди. Мунда республикабызны шагьарларындан ва районларындан чыгъып яшайгъан анадаш халкъыбыз бар.
Оразаны шо гюнгю ахшамында Къызылюртну жума межитини майданында «Рамазан айны чатыры» деген чараны умпагьатлы кюйде оьтгеривде темиравуллу Рустам Жакъавов къасткъылды.
Гьаракатны башында Дагъыстанны башчысы Сергей Меликовну ойчусу Шамил Алиев, «Инсан» деген фондну къуллукъчусу Магьаммат Алиасгьабов, Чонтавул юртну имамы Арсланали-гьажи Аскеров жыйылгъанлагъа Рамазан айны сыйлылыгъы гьакъында насигьатлар берди.
Мунда къурулгъан чатырны тюбюнде шо гюн ахшам 1500 адам оразасын ачды. Эсгерилген гьаракатны оьтгеривде Хасавюрт районну Яхсай, Темиравул, Эндирей, Муцалавул юртларындан, сонг да Къызылюрт районну Солтан-Янгыюрт, Чонтавул, Стальский ва Хумторкъали районну Шавхал-Янгыюрт, Гьажидада ва Буйнакск районну оьзге юртларындан гелгенлер де тутгъан оразасын ачагъанлагъа аш-сув булан дегенлей садагъа гьисапда рагьмулукъну болдурдулар. Шо гюнгю «Рамазан айны чатырыны» гьаракатын оьтгеривде юрюлген сиптечиликни «Инсан» деген рагьмулукъ фондуну янында да якълав тапгъан.
Эсгерилген сиптечиликни башын тутгъан Рустам Жакъавов, бойнуна алып, бу инсаплы ишни ахырына ерли чыгъаргъан бары да ватандашлагъа, юртлулагъа, асгерчилеге, оланы агьлюлерине кёмек этегени учун, шолай да бу рагьмулукъ ортакъчылыкъ этгени учун баракалла билдирди.
Оьз гезигибизде, шолай кёмек къолун ялгъагъанлагъа ва юртланы жамаатыны атына разилик билдирме сюебиз.
Этген садагъаларыгъызны, тутгъан оразаларыгъызны, этген ибадатларыгъызны, къылгъан намазларыгъызны да Аллагьутаала къабул этсин! Амин!
