Мычыгъышда Башир-шайыхны атындагъы межит ачылды
Мычыгъышда Башир-шайыхны атындагъы межит ачылды
Гьали-гьалилерде хоншудагъы Мычыгъыш республикада Гойское деген юртда янгы межит ачылып, огъар яхсайлы Башир-шайыхны аты берилди. Бу къумукъ алимни аты Темиркъазыкъ Кавказда генг яйылгъан ва кёплеге танывлу болгъан. Ол илмугъа уьйретегенде йимик, кавказ давну жагь ортакъчысы да болгъан. Яхсайда яшагъан ва мундан туруп ярыкъландырыв иш юрютген Башир-шайых Ислам динни яймакъ учун кёп гьаракат этген, уллу натижалагъа етишмеге де болгъан.
Ону абурлугъундан, этген ишлерини яхшылыгъындан XIX асруда Яхсай дин илмуну центры санала, бу якълагъа Темиркъазыкъ Кавказны ер-еринден кёплер гелип, билим алмагъа гьасирет болгъан. Гертиден де, ол ва ону йимик яхсайлы да, оьзге къумукъ юртланы алимлери де Аллагьны ﷻ динин яймакъ учун хыйлы иш этген, ваъза-насигьаты булан йыракъ ерлеге етишген.
Муна шулай гьаракатгъа гьюрмет этип ва баракалла билдирмек учун хоншудагъы къардаш халкъ янгы тизилген ерли межитге Яхсайны гёрмекли адамларыны бириси – Башир-шайыхны атын къоя.
Межит ачылыв кёп халкъны къуршай, бу агьвалат булан къутламакъ учун ер-ерден хыйлы адам жыйыла, къуванч гелтиреген ишде ортакъчылыкъ эте.
Гойское деген юртну жамияты, гьакъ кюйде, ажайып маъналы иш этди: оланы гьаракаты булан хоншу халкълар бир-бирине бакъгъан гьюрметни, абурну бирден-бир бек сезеген болду. Межит – эки де халкъны арасындагъы къардашлыкъны дагъы да бек ювукъ этди деп айтса къопдурув болмас.
Башир-шайыхны атындагъы межитни къургъанланы къыйынын, шо ишде ортакъчылыкъ этген бары да бусурман халкъны гьаракатын Есибиз къабул этсин, Аллагьны ﷻ бу янгы Уью намаз къылагъанлардан даим толуп болсун.
