Ону юрекден бузуп тайдырмас
Швецияда болгъан вагьшилик янгыз бусурманланы тюгюл, сав гьакъыллы оьзге адамланы да гьалек этди. Ерли бир оьжетли партияны Расмус Палудан дейген ёлбашчысы адамланы алдында Къуръан яллатгъанны айтаман.
Бу бузукъ иш Стокгольм ва Копенгаген шагьарларда Россия ва Тюркия пачалыкъланы элчилик биналарыны алдында журналистлер жыйылгъан ерде этилди. Жинаятчылыкъ этилегенде, зулмучугъа бирев де пуршав этмейген кюйде, ону полиция къурумлар аман сакълайгъаны болгъан ишни авурлугъун дагъы да бек оьрчюкдюре.
Бу кюйдеги питне ва оьжетлик тувдурагъан провокация иш этилегени биринчилей тюгюл ва Швецияны гьукуматы шогъар къаршы бир зат да этмей, дюньялыкъ бусурман къурумланы чакъырывларына агьамият да бермей. Гетген йылны апрель айында да, Палудан полициядан бир къаршылыкъ гёрмей, Къуръанны яллатгъан эди. Бу адам оьз пачалыгъында Ислам динни гери урмагъа ва башгъа уьлкелерден гёчюп гелгенлени къуваламагъа герек деп чакъырыв эте.
Бу агьвалатгъа байлавлу Швецияны гьукуматына, провокацияланы токътатмагъа герек деп, нечесе керен айтылды, талап этилди. Шолай чакъырывлар бары да бусурман пачалыкълардан болду, Россияда яшайгъан бусурман жамият да шогъар къошулду. Къуръангъа байлавлу вагьшилик этгенлени жавапгъа тартмагъа герек, деп Швециягъа талап салынды.
Амма Швеция шо чакъырывлагъа сесленмеди. Бу пачалыкъны тыш ишлерине къарайгъан министри билдирген кюйде, Къуръан яллатыв – демократия, Палудан буса, Тюркияны президенти Режеб Тайип Эрдоган Швецияны НАТО-гъа гирмеге ёл ачгъанча, гьар жумагюн Къуръан яллатып туражакъ.
Ажайып иш тюгюлмю? Сав дюнья къаршы чыгъып, гьалекленип турагъанны гьисапгъа алмай, демократияны оьзеги деп оьзюн санайгъан Швецияны гьукуматы бир зат да этмеге къарамай. Башгъа динлеге, халкълагъа, расалагъа гьюрметли янашыв къайда? О якъларда инсаплыкъдан бир зат да къалмагъанмы?
Азатлыкъ...
Булай алгъанда, оланы эркинлиги, азатлыгъы Ер юзюндеги бир миллиард ярым адам сыйлап, къыйматлап юрюйген Китабын хорламакъдамы? Ончакъы халкъны сан этмейгенлик янгыз бир адамдан гелмей, шолайлыкъны сав партия арив гёре, пачалыкъ буса этеген ишине ёл къоя.
Къуръанны нече китабын яллатса да, Ислам динни ва инсаплыкъны душманлары не этсе де, шолар Яратгъаныбызны каламына зарал этмеге болмас. Олар, кагъызны яллатмагъа болар, тек Аллагьны ﷻ Китабы Къудратлы Есибизни якълавуну тюбюнде.
Есибиз ону сакъламакъны Оьзюне алгъан
Есибиз Аллагь ﷻ Къуръанда булай айта (маънасы): «Гьакъ кюйде, Биз (Къуръанны) Насигьат (гьисапда) тюшюргенбиз ва Биз шексиз кюйде сакълажакъбыз шону (къынгырлашывлардан ва алышынывлардан)» («Аль-Хижр» деген сура, 9-нчу аят).
Аллагьу таала Мугьаммат Пайхаммаргъа ﷺ Къуръан тюшюрген, Ол Оьзю ону къынгырлашывдан яда алышдырывдан сакълажакъ болгъан. Бизге буса, бу Машгьур Китапны охумагъа, ахтармагъа ва шонда язылгъангъа гёре этмеге къала.
Гьукуматны ихтиярындан Европалы бир уьлкеде Сыйлы Китапны копиясын яллатгъанлыкъ иманы барлар учун, озокъда, уллу балагьлы иш. Шо адам имансыз, шайтанны ёлуна тюшген сатанист яда гьакъылгъа мукъ, ким болса да, ол миллионлар булангъы бусурман уьмметни менлигине тийген.
Есибиз Аллагь ﷻ Къуръанда булай айта (маънасы): «…Гьакъ кюйде, Аллагь ﷻ адамланы гьалын алышдырмай, олар оьзлени алышдырмай туруп. Ва эгер Аллагь ﷻ адамлагъа яманлыкъ ёраса, бир зат да шолайлыкъны токътатмагъа болмас. Оланы Ондан къайры дагъы башгъа якълавчусу ёкъ» («Ар-Раъад» деген сура, 11-нчи аят).
Сыйлы Китапда шо кюйдеги маъна булан дагъы да бир-нече аят бар. Шолардан биз англамагъа болагъан кюйде, иманы бар адам оьз уьстюнде ишлемеге ва гьалын яхшы якъгъа багъып алышдырма тарыкъ, Есибизни буйрукъларын кюте туруп.
Иманы барлар провокациялагъа ёл къоймагъа герекмей ва ойлашмай этилеген абатлардан сакъланмагъа тарыкъ. Балики, вагьшилик этип, бизден шону къаравуллайдыр. Гёресиз чи, эсгерилген шо адам этеген яман ишин пачалыкъ якълавну тюбюнде эте. Полиция ону оьр къуллукълу гьаким йимик аман сакълай болгъан. Шо гьал кёпню англата. Бусурманлар буса, жанлы гьаракаты булан, Къуръан – яшавуну айрылмас ёлдашы болагъан кюйню этмеге герекли.
Алдагъы йылларда Европаны башгъа уьлкесинде Мугьаммат Пайхаммарны ﷺ мысгъыллайгъан суратлар чыгъармагъа башлагъанда дюньядагъы бусурманлар ону яшав ёлун бирден-бир терен ахтармагъа башлады. Бугюнгю гьалда буса, провокациягъа жавап гьисапда, Къуръанны оьзюбюзге ювукъ этмеге, ону охумагъа ва язылгъанын яшавгъа чыгъармагъа къарасакъ, лап яхшы болмасмы дагъы?
Гертиден де, Къуръанны дурус охумагъа гиришсек ва болгъан чакъы кёп ону аятларын гёнгюнден билсек, маънасын англайгъан болсакъ, оьзгелеге шо гьакъда дарс берсек ва, аслусу – Къуръан буйрукъланы кютюп яшасакъ, душманлагъа лап арив къаршылыкъ да болур, оьзюбюз учун да пайдалы гьукму болур.
