Къуръан охумакъгъа чакъырыв
Гьакъ кюйде, яшавубузда Къуръан ажайып маъналы ер тута. Къуръан – иманы бар адамны юрегинде ёл гёрсетеген маякъ йимик, неге десе Сыйлы Китап инсанлагъа нечик яшамагъа герекни англата.
Сыйлы Къуръан Яратгъаныбыз адам урлукъгъа бакъдыргъан ахырынчы Китап. Мугьаммат Пайхамаргъа ﷺ Есибиз Оьз каламын 23 йылны узагъында тюшюрген. Шонда язылгъаны алдагъы Сыйлы Язывланы барысыны да жамын чыгъарта ва оланы гьакълыгъын белгилей.
Куръанны даражасын бары да бусурманлар яхшы биледир. Амма биле буса да, тек дазусу ёкъ шондагъы денгиз-дерия чакъы билимни, ону яхшылыкъларын ва ниъматларын ахтармагъа, уьйренмеге къарамакъны артгъа салагъаны тамаша тие.
Шо саялы юреклени Къуръан охувгъа гьасирет этмек учун шу гиччи макъала язмагъа токъташдыкъ.
Къуръан охумакъны сюймек учун бизге не тарыкъ болажакъ?
Биринчилей, оьзюн охуйгъан адамны Сорав алынагъан гюн Къуръан якълажакъны англамагъа тарыкъ. Пайхаммар ﷺ шо гьакъда булай айтгъан: «Къуръан охугъуз, неге десе, гьакъ кюйде, Къыямат гюн оьзюн охуйгъан адам учун шо якълавчу болуп чыгъажакъ» (Муслим).
Экинчилей, сыйлы Китапны охугъан саялы болагъан шабагъатны гёз алгъа гелтирмек. Охулгъан гьар гьарп саялы бир яхшы иш языла ва гьар яхшы иш буса, он керен артып шабагъатлана. Къуръан охума башлагъанда этеген яхшы ишлеригиз къошулагъанны ва артагъанны сезмеге къарагъыз.
Уьчюнчюлей, Къуръанда язылгъан сёзлени маънасыны гьакъында ойлашмакъ. Охугъан гьар аят тувра сизге бакъдырылгъан деп гьис этигиз. Сыйлы китапдагъы гьар сёзге биз терен ойлашгъанны сюе Есибиз.
Сорав алынагъан гюн бизин учун шапаат этилгенни ва Аллагьу таала бизге рази къалгъанны сюе бусакъ, Къуръан охумагъа башлайыкъ ва шондагъы буйрукъланы яшавгъа чыгъармагъа къаст къылайыкъ. Шу ёлубузда Аллагь ﷻ кёмек этсин.
